[retour à un affichage normal]

Mazarinade n° B_13_15

Image de la page

Anonyme [1649], LES DIVINES REVELATIONS ET PROMESSES FAITES A SAINCT DENYS PATRON DE LA France, ET A SAINTE GENEVIEFVE PATRONE DE PARIS, EN FAVEVR DES FRANCOIS. CONTRE LE TYRAN MAZARIN. Apportées du Ciel en Terre par l’Archange S. Michel. , françaisRéférence RIM : M0_1164. Cote locale : B_13_15.

Saints, si les iniquitez des François m’ont obligé à desployer
mes verges contre eux, & si estant leur pere, l’affection que
ie leur porte m’oblige à les chastier : Mais soyez asseurez de la continuelle
protection que ie veux porter au Royaume des Fleur-de
Lys & à son ieune Roy, lequel ie veux combler de toutes mes graces
& benedictions, rendant son Regne paisible & sa personne
triomphante de toutes les Nations de la Terre : & encore qu’il
vous semble que mon indignation soit extreme : Consolez-vous,
& vous resioüissez, & asseurez les François de ma part, que ie feray
bien-tost trébucher ce superbe Tyran qui les veut perdre, &
que ie vengeray son ingratitude dans son sang ; Ie suis le Dieu de
Paix, & le iuste Iuge, qui briseray comme du verre cet orgeuilleux,
& qui remettray ce Royaume en sa premiere splendeur, donnant
repos aux affligez, & confusion à ceux qui ont persecuté les
innocents, & comme ie suis le Dieu Tout puissant, qui sonde
les cœurs & les pensées des hommes : le sçay bien que ce méchant
dont ie me suis seruy pour chastier toute la Chrestienté, n’a iamais
conceu que des choses mauuaises, pour enfanter les maux qu’il a
faits, & que son ambition extreme & son auarice insatiable l’ont
poussé à commettre plusieurs trahisons contre le Royaume de
France, duquel ie vous ay estably Patrons & conseruateurs ; & que
ce meschant a secrettement fait sa Paix auec le Roy d’Espagne,
qui est son Prince naturel, aux despens de toute la France qu’il a
ruinée, à dessein de la rendre si foible qu’elle ne pût se defendre
contre ses Ennemys, qui autrement n’en sçauroient venir à bout ;
Mais soyez asseurez que ie tiens le sang des François si pretieux, &
la personne de leur Roy si chere, que ie dissiperay les desseins de
cet ingrat & perfide, & que ie m’en vay le rendre semblable à vne
petite nuée qui passe & qui s’éuanoüit en vn instant ; Car comme
ie vous ay souuent annoncé par mes Prophetes : Les hommes sanguinaires,
cruels & pleins de fraude ne paruiendront point à la moitié de leurs
iours. Et pource que ce malheureux a ensorcelé l’esprit de la Reyne
Regente, & que s’est sous son authorité qu’il a commis impunément
tous les crimes. I’ouuriray & illumineray les yeux de l’entendement
de cette Princesse, & encore qu’elle soit incessamment
obsedée par les Pensionnaires de cet infidele Ministre, qui luy cachent
tout ce qui la pourroit obliger à luy vouloir du mal, & qui
ne l’entretienne iamais que de choses admirables & à son auantage,