Mazarinade n° C_1_35
Image de la page
Anonyme [1649], LES CONTENS ET MESCONTENS, SVR LE SVIET DV TEMPS. , français, latinRéférence RIM : M0_782. Cote locale : C_1_35.
pour repliquer à cette iniure, en la menaçant de luy donner sur la moitié de
son visage, vn ieune Aduocat s’auança de dire là dessus, qu’il auoit remarqué
que les Bouchers à leur dire, n’auoient iamais que du bœuf, & les Cordonniers
que de la vache, que voulez-vous dire des Cordonniers, Monsieur
l’Aduocat de cause perduë, repart vn de cette vacation, ils sont honnestes
gens, & ne sont pas des cousteaux de tripieres, comme vous qui playderiez la
plus mauuaise cause pour vn teston, & qui prenez le plus souuent de l’argent
des deux parties, ne sutor vltra crepidam, luy replique l’Aduocat, vous estes vn
sire dans vostre boutique, qui par de cire, dit là dessus vn Espicier, ie voudrois
que tous les mestiers fussent exempts de tromperie comme le nostre, il n’y
auroit pas tant de monde de damné, il ne faut iuger de personne, dit vn Prestre
en retroussant sa soutane, qui se iustifie est ordinairement le plus coupable ;
meslez-vous de dire vos Oremus, luy replique l’Espicier sans venir faire
icy des Sermons en pleine ruë, le Prestre fut prudent, & se retira de la meslée
doucement sans rien dire dauantage ; ce que voyant vn Colporteur, il dit à
l’Espicier en riant, vous auez donné le fait au Prestolin, le voila penaut comme
vn fondeur de Cloches, est-ce pour m’offenser, dit là dessus vn fondeur, il
semble que tu me montre au doigt ; helas mon pauure frippon tu le serois
bien autrement, sans les rogatons dont tu amuse le peuple, & sans les sottises
que l’on te donne à debiter, tu aurois bien la gueulle morte, & ta femme seroit
bien contrainte de mettre en gage les bagues & le demy ceint, pour mettre
du pain sous ta dent, il en eust dit dauantage, sans le bruit d’vn autre dispute
qui fit tourner tout le monde, pour voir ce que c’estoit.
Vn ioüeur de luth du party des mescontens auoit desia dit quantité d’iniures
à vn Charcutier, qui n’auoit pas la mine d’auoir souffert aucune disette
pendant le siege, il auoit les iouës rebondies comme les fesses d’vn pauure
homme, & la troigne si luissante de gresse, que l’on se fust miré dans son visage,
le ioüeur de luth au contraire estoit sec comme son instrument, couuert
d’vn petit manteau noir de serge de Rome sur vn habit de couleur extremement
minée, il auoit toutefois vn nez violet qui auoit la mine d’auoir esté
rouge autrefois, & s’estre baigné dans vne infinité de verres de vin, le Charcutier
l’auoit vn peu poussé, ce qui l’ocasionna de luy dire que s’il auoit rõpu son
luth, il luy auroit fait sauter sa boutique : Ha le Gascon, dit là dessus le Charcutier,
n’est ce point vn cotret au lieu d’vn luth, & voulant leuer son manteau
pour s’en esclaircir, l’estoffe estant vn peu mure, il en déchira sans y penser
vne bonne partie, & ponr l’aigrir encore dauautage, luy dit en retirant sa
main, il est de damarre, il quitte le noyau, le ioüeur de luth picqué de ce
double affront, se mit à luy chanter inures à bon escient, considerant qu’il
n’eust pas esté le plus fort à vuider ce different à coups de points ; Comment,
commença-t’il à dire, maistre Salisson, Marmiton, Graillon, Secuillon, Broüillon,
as-tu bien l’impudence de mettre tes mains infames sur moy, qui sont
encore toutes pleines de merde, que tu nous fais manger dans tes andoüilles,
va va Marquis de Sale bougre vendre ton boudin creué, & ton pourceau,
ladre pour empester le monde, & ne te mesle pas de venir engraisser mon
luth ny mes habits, le Charcutier sans s’émouuoir beaucoup de ces inuectiues,
Image de la page