[retour à un affichage normal]

Mazarinade n° B_17_17

Image de la page

Anonyme [1652], LES CONDITIONS DE L’ARREST RENDV SVR LE IVGEMENT d’entre l’Autheur DE LA VERITÉ TOVTE NVE, ET L’ADVOCAT GENERAL Partie Aduerse. , françaisRéférence RIM : M0_733. Cote locale : B_17_17.

& autres plaisirs ne sont licites aux Roys, qu’apres qu’ils
auront vacqué à l’Estude, des affaires de leurs Estats, & qu’ils
les auront appris, & neantmoins, c’est à present tout leur exercice.
 
O crimes, aux Princes, aux Parlements, aux Estats, qui se
soucians peu du salut des peuples, n’apportẽt point de remedes
aux malheurs ! Mais combien de gloire auront acquis ceux qui
par vne constante & inuiolable vertu auront preserué leur Patrie
de naufrage, & tiré hors de la tyrannie.
C’est vous Senateurs de la Cour Souueraine de Paris qui par
vne generosité heroїque, vous estes opposez à l’vsurpation de
la gloire du Roy, qui pour appuyer fermement vostre iuste procedé
auez ioint l’authorité du Roy en la personne de S. A. R.
C’est vous Bourgeois de Paris qui auez tant fait paroistre vostre
noble courage pour la conseruation des Administrateurs
de Iustice. C’est vous seuls qui meritez le Titre de Peuple libre,
& qui par vostre exemple, auez asseuré la vertu de vos Compatriotes
& autres Villes du Royaume pour fermer leurs portes
aux Estrangers,
Mais c’est de vous, Monseigneur, & par vous que la France va
respirer, & reprendre la vie & la ioüissance de ses biens, tant
de peris par les desordres de la guerre Intestine. C’est vous qui
ayant herité parfaitement l’humanité de Henry le Grand vostre
Pere pour les peuples, auez merité les acclamations de Liberateur :
& qui attendent vne Paix Generale dont vous serez
l’Autheur, Finalement que par vos soings ordinaires & ceux du
Parlement vous la ferez sceeller par Assemblée des Estats, ou
pour le moins des Notables du Royaume, sans quoy il est à
craindre qu’vne recheute ne nous accable sans nous pouuoir
releuer.
Voyez & apprenez le Remede aux Malheurs de l’Estat, preuoyez
par les Presages du Changement en l’Estat, Apprenez qu’il
faut fuir les Medisans par le Iugement rendu sur le Plaidoyer de
l’Autheur de la Verité toute Nuë, & Retenez l’honneur qu’il faut
rendre aux Rois, par l’Arrest sur le Iugement rendu contre lesdits Autheurs,
comme par ces presentes vous auez appris les Conditions
de l’Arrest.

FIN.