[retour à un affichage normal]

Mazarinade n° A_5_101

Image de la page

Anonyme [1649], LE VRAY AMATEVR DE LA PAIX, CONTRE LES ADVIS dangereux du Libelle intitulé, ADVIS SALVTAIRE & genereux, &c. , françaisRéférence RIM : M0_4065. Cote locale : A_5_101.

& qu’elle a esté confirmée en des iours, ausquels,
à l’exemple des Atheniens qui n’en traitoient
aucune pour estre durable qu’en robe de dueil, nos
temples & nos cœurs estoient reuestus des marques
lugubres sur la mort du grand Pacificateur. Le Roy
comme pere commun de ses peuples sous la Royalle
& vertueuse conduite de la Reyne sa mere qui en
tient la Regẽce, nous l’a enuoyée par l’entremise des
Sages deputés de part & d’autre, qui y ont apporté
tant de prudence & d’integrité, qu’apres auoir vaincu
des difficultés presque inuincibles, elle a esté glorieusement
concluë dautant plus au contentement
des suiets, qu’elle est venuë contre leur attente, iurée
par leurs Maiestés, les Princes, & les Parlements, &
receuë d’vn chacun auec des reiouyssances & des acclamations
plus aisées à croire qu’à exprimer. Voila
la France libre, ne souffrons plus qu’on la captiue,
qu’on renouuelle ses fatigues, & qu’on rallume les
feux de la guerre qui ont esté si genereusement esteints.
Le Ciel arbitre de nos differents pronõce par
le consentemẽt de deux partis, & le cõmun desir de
ce sacré nom de Paix, la Colomne des Loix, la
consolation des gens de bien, la ruine des meschans,
la gloire de Dieu, la perle des Couronnes,
la Tutrice des Arts, la source de tous biens, qui
rend l’ordre aux Estats, & par l’ordre remet leurs
forces en nature ; Qui ne peut-estre desaggreable
qu’à ceux qui se plaisent au massacre de leurs freres,
pour assouuir leur rage, au bannissement de
leurs Citoyens, pour profitez de leur retraicte, à
l’embrasement de leurs maisons, pour se resioüir
de leurs malheurs, au pillage de leurs biens pour en
esperer des despoüilles, à la licence de toutes choses,
pour auoir les coudees franches à exercer leur
perfidie, & bref qui n’ont rien de l’homme que le