[retour à un affichage normal]

Mazarinade n° A_7_69

Image de la page

Anonyme [1649 [?]], LE VERITABLE AMY DV PVBLIC. , français, latinRéférence RIM : M0_3917. Cote locale : A_7_69.

ses Preuosts, & les Femmes dominent sur luy : Que vous reuient-il
il de fouler mon Peuple, chap. 10. Malheur sur ceux qui ordonnent
des ordonnances d’extorsion, & qui dictent l’oppression
qu’on leur a dictée. Malheur sur ceux qui appellent le mal bien,
& le bien mal, qui font les tenebres lumiere, & la lumiere tenebres,
qui font l’amer doux, & le doux amer, &c.] Toutes ces diuines
paroles sont autant d’oracles dont nous auons l’accomplissement
deuant nos yeux, & il n’y à que des aueugles qui ne le
puissent voir, mais des aueugles volontaires coulpables de leur
aueuglement fermans les yeux pour ne pas receuoir les rayons de
cette esclatante lumiere qui ne les pourroit esclairer que pour
leur honte & confusion.
 
Ie ne veux pas m’estendre icy d’auantage, laissant cette noble
matiere pour des Theologiens. Ie diray seulement en passant sur
ces paroles du Prophete, le Peuple sera rançonné l’vn par l’autre,
vn chacun par son prochain, que nous auons mis cette glose.
Les François sont si forcenez par le iuste Iugement de Dieu, qu’ils
se fouleront & mangeront les vns les autres. Qui voudroit prendre
garde à toutes les extortions, cruautez, & tyrannies qui
s’exercent en France sur tous les Subjets du Roy, trouuera que
c’est le Clergé, la Noblesse, & le Tiers Estat, sont deuenus
les complices de ceux qui ruinent l’Estat, & les suposts de la tyrannie.
Le temps est bien mauuais, dit on, quand les Loups se
mangent les vns les autres. Hé que void-on auiour-d’huy que de
Lixantrophes ! le Prelat escorche ses brebis au lieu de les tondre,
& les deuore, il n’espargne pas mesme le Clerc. Le Prince auale
des gend’armes tous entiers. Le President mange le Conseiller ?
& de luge deuient chef des Partisans & du monopole, vn chacun
pille son prochain : Le Marchand sert d’Espion, & de Maltotier
contre le Marchand : Le Tauernier sert de Mouchard, & va visiter
la caue de son voisin : Et l’Imprimeur court par les Imprimeries
pour surprendre l’Imprimeur : en vn mot du plus grand iusques au
plus petit chacun tasche de se reuestir de despoüilles ou se gorger
du sang de son voisin.
De plus nous nous entendons auec nos ennemis ; pour eux il
n’est rien de si saint & sacré, pour qui ils ayent du respect. Nous
auons du scrupulle, & croyons faire contre les loix de faire la
guerre ou repousser la violence de ceux qui les ont toutes violées.