[retour à un affichage normal]

Mazarinade n° C_7_60

Image de la page

Anonyme [1649], IVGEMENT ET CENSVRE DES TROIS LIBELLES INTITULEZ, la Replique, le Donjon, & le Retorquement du foudre de Iupinet, faits par l’Hypocrite à la fausse barbe. Iudas auoit obtenu portion à l’administration des Apostres. Act. Chap. 1. Vers. 18. , français, latinRéférence RIM : M0_1773. Cote locale : C_7_60.

vos lunettes à grand ressort, pour voir si vous
pourrez trouuer mieux que moy la contexture,
& la suitte de tant de sections si broüillées que
les siennes. Albuquer que Viceroy des Indes,
pour le Roy de Portugal, se voyant tout prest à
faire naufrage, chargea sur ses espaules vn ieune
garçon, afin deuiter par le moyen de ce pauure
innocent, les traits de la iustice Diuine, qui
pendoient dessus sa teste, pour le punir de ses
crimes. Et nostre hypocrite à la fausse barbe,
charge en apparence sur luy la cause de Dieu,
pour pouuoir impunement outrager toute sorte
de personnes, auec plus de facilité, sans qu’on
ose à ce qu’il s’imagine, s’attaquer à luy, comme
si la cause de la verité & la sienne estoient inseparables :
mais nous fairons bien voir, s’il plaist à
Dieu sur la fin de ce discours, que nous sçauons
vn peu mieux que luy, distinguer la cause de
Dieu, d’auec la cause d’vn zelé hypocrite. Dieu
commande bien de reprendre le vice, en la personne :
mais il n’entend pas aussi qu’on calomnie
l’innocent, & qu’on le charge de crimes : en
fin toute cette page & toute la page suiuante, ne
sont noircies que de ses crimes & de ses pedenteries.
 
Bref pour n’estre pas trop long sur vne matiere
si ennuyeuse, voyez en la page 16. ligne premiere
& tout ce qui fuit, si vous y trouuerez rien
que des contes facetieux & des pedenteries outrageuses,