[retour à un affichage normal]

Mazarinade n° B_2_7

Image de la page

Ailly-Annery, Charles d' [signé] [1652], LETTRE CIRCVLAIRE ENVOYEE à tous les Gentils-hommes de France, pour leur addresser l’Arresté fait à l’Assemblée de la Roche-guyon, les Memoires dont on a chargé nos Deputez pour presenter au Roy, & le fouorable traittement qu’ils ont receu de sa Majesté, dattée de Marine le premier Iuillet 1652. , françaisRéférence RIM : M0_1824. Cote locale : B_2_7.

LETTRE CIRCVLAIRE
enuoyée à tous les Gentils-hommes de France, pour
leur addresser l’Arresté fait à l’Assemblée de la
Roche-Guyon, les Memoires dont on a chargè nos
Deputez pour presenter au Roy, & le fauorable
traittement qu’ils ont receu de sa Majesté, dattée
de Marine le premier Iuillet 1652.
MESSIEVRS,
La Lettre circulaire que nous vous auons escrite de Nogent
le Roy le seiziesme du mois de May vous aura instruit
des motifs de nostre Vnion & de nostre conduite iusqu’à
ce iour là.
Pour vous donner connoissance des choses qui se sont
passées depuis, nous vous enuoyons ce qui a esté arresté
le neufiesme de Iuin dans l’Assemblée de la Roche-Guyon,
auec les Memoires qui ont esté presentez au Roy par nos
Deputez, dont nous vous aurions fait part plustost si nous
n’auions sceu estre obligez d’en differer la publication iusques
à ce que le Roy nous eust fait la grace de les receuoir.
Nous vous faisons sçauoir auec vne ioye extréme, que
la malice de nos ennemis n’a pas empesché que nos Deputez
n’ayent esté tres-fauorablement receus, & que le Roy
& la Reine les ayent asseurez eux-mesmes qu’ils ne doutoient
plus de la sincerité de nos intentions.