[retour à un affichage normal]

Mazarinade n° C_9_85

Image de la page

Nervèze, Suzanne de [signé] [1649], LE RIEVR DE LA COVR AVX BOVFONS, Satiriques, Flateurs à gages, & Compteurs de nouuelles, , françaisRéférence RIM : M0_3549. Cote locale : C_9_85.

manteau de la vertu, les faux vieillars accusateurs de la
chaste Suzanne, la condamnoit comme criminelle, de
rage de n’auoir peu la rendre complice de leur crime,
mais cette noire malice trouua ses bornes dans la fin de
leur authorité & de leur vie, Daniel seruiteur de Dieu,
descouurant le venin de ces detestables Iuges & l’innocence
de l’accusée, si bien que c’est du Ciel & de sa iustice
que nous deuons pretendre toutes nos joyes, le
Medecin guerit d’ordinaire nos maux par purgation,
nos ames peuuent prendre mesme remede, purgeons-nous
de toute mauuaise volonté pour nostre prochain,
voyons ses interests & sa conduitte sans passion ny animosité,
& nous aurons moins de repugnance à ses aduantages,
Dieu ne veut pas que nous penetrions ses secrets,
il nous suffit d’adorer ses iugemens, il nous le tesmoigne
en la personne de sainct Pierre qu’il luy demande
que deuiendroit sainct Iean lors qu’il luy respondit,
que te chaut il qu’il fasse si ie veux qu’il demeure iusques
à ce que ie vienne, ainsi que nous importe de sçauoir
les affaires d’estat si nous ne sommes pas naïs à leur
direction, nous en parlons comme les aueugles des couleurs,
mais si nous apprenons à nous taire, nous paruiendrons
à ce haut degré de prudence & de sagesse que
nous deuons souhaiter & posseder preferablement à
toutes les dignitez imaginables, esuitons le blasme du
curieux impertinent, rentrons dans nous mesme par reflexion
de iustice sans imiter cette Ladmie des Poëtes
qui laissoit ses yeux à la porte de sa maison & y demeurent
tousiours aueuglé, reformons nos imperfections,
& nous trouuerons aduantageusement la couronne de
nos trauaux auec la plaine recompense de la violence
que nous aurons faites à nos mauuaises inclinations,