[retour à un affichage normal]

Mazarinade n° B_17_28

Image de la page

Dubosc-Montandré, Claude [?] [1652], L’ESPRIT DE LA VERITÉ Representant nuëment la Puissance & l’Authorité du Roy. Dedié à Son Altesse Royale. , françaisRéférence RIM : M0_1283. Cote locale : B_17_28.

& autres plaisirs ne sont licites aux Roys, qu’apres qu’ils
auront vacqué à l’Estude, des affaires de leurs Estats, & qu’ils
les auront appris, & neantmoins, c’est à present tout leur exercice.
 
O crimes, aux Princes, aux Parlements, & aux Estats, qui se
soucians peu du salut des peuples, n’apportẽt point de remedes
aux malheurs ! Mais combien de gloire auront acquis ceux qui
par vne constante & inuiolable vertu auront preserué leur Patrie
de naufrage, & l’auront tiré hors de la tyrannie.
C’est vous Senateurs de la Cour Souueraine de Paris qui par
vne generosité heroïque, vous estes opposez à l’vsurpation de
la gloire du Roy, qui pour appuyer fermement vostre iuste procedé
auez ioint l’authorité du Roy en la personne de S. A. R.
C’est vous Bourgeois de Paris qui auez tant fait paroistre vostre
noble courage pour la conseruation des Administrateurs
de Iustice. C’est vous seuls qui meritez le Titre de Peuple libre,
& qui par vostre exemple, auez asseuré la vertu de vos Compatriotes
& des autres Villes du Royaume.
C’est par vous, Monseigneur, que la France respirera, &
c’est par vous qu’elle reprendra la Vie, & ioüira de ses biens
perdus & dissippés par les desordres de la Guerres Intestines.
C’est vous qui estant le Legitime Heritier des Heroïques Vertus,
du Feu Roy Henry le Grand Vostre Pere, iustement appellé
Pere de son Peuple, meriterés par vos Vertus les acclamations
d’vn chacun, & ferés qu’en contribuant à vne Paix
generale par l’Vnion de vos Veux & de vos affections à celle
de nostre Roy Tres Chrestien, les Filles de Sion chanteront
deuant vous les Loüanges du Liberateur, & les Peuples ioüissants
du fruit de cette Paix generale, apres l’honneur rendu
au Roy, beniront à iamais & Vostre Altesse & sa Posterité.

FIN.