[retour à un affichage normal]

Mazarinade n° B_3_3

Image de la page

Anonyme [1652], L’ESPRIT DV FEV ROY LOVIS XIII. A SON FILS LOVIS XIV. Luy monstrant que la mauuaise conduite de Mazarin, est la cause des troubles de l’Estat. Et luy donnant les moyens infaillibles de les appaiser, par son retour en sa bonne Ville de Paris. , françaisRéférence RIM : M0_1287. Cote locale : B_3_3.

autres hommes ? Mais ce qu’elle vous a donné,
ne tasche t’elle pas de vous l’oster dans les perils
où elle expose sans cesse vostre personne, pour
l’interrest de son fauory ?
 
Quoy donc ? vous a t’elle donné l’exemple de
ses hautes vertus à suiure ? ou comme la Reine
Blanche vous rend-elle redeuable à ses soins de
l’auantage d’vne belle education qui forme vos
mœurs sur le modele des plus grands hommes
de l’Antiquité ? Est-ce elle aussi qui vous rend heritier
du Sceptre de Pharamond & de Charlemagne,
& par qui le droit de commander à tant de
belles Prouinces vous fut acquis, si-tost que
vous eustes la liberté de respirer ? Est-ce elle enfin,
qui vous auoit rendu maistre de tant de Villes
conquises sur les anciens ennemis de vostre
Estat, & dont la prudence & les soins auoient
rendu par ce moyen vostre Throsne redoutable
à toute l’Europe ? Que si tous ces biens qu’elle
vous rauit maintenant, vous furent attachés à
l’heure de vostre naissance, en qualité de premier
né du Monarque absolu de cet Empire, iugez si
elle n’est pas vostre plus cruelle ennemie, lors
qu’elle vous en priue par son impatience d’en
joüir ; & si vous ne la deués pas regarder d’vn
œil de courroux, comme le plus grand obstacle
que la fortune pouuoit mettre à vostre bon-heur,
& comme l’agent fatal qui preste sa main au mauuais
genie de la France, pour vous abaisser autant