Mazarinade n° B_3_3
Image de la page
Anonyme [1652], L’ESPRIT DV FEV ROY LOVIS XIII. A SON FILS LOVIS XIV. Luy monstrant que la mauuaise conduite de Mazarin, est la cause des troubles de l’Estat. Et luy donnant les moyens infaillibles de les appaiser, par son retour en sa bonne Ville de Paris. , françaisRéférence RIM : M0_1287. Cote locale : B_3_3.
indignes de vous, les diuertissemens, ausquels
il vous conuient, parce qu’ils tendent à vous captiuer ;
tesmoignez comme Alexandre, que vous
iouërez volontiers quand des Roys seront de la
partie : & cependant faites-vous instruire dans
les deuoirs, dans la Morale, dans la Politique,
& dans l’art militaire, & ioignez tousiours la Pratique
à la Theorie ; ne croyez rien à credit touchant
les auantages supposez de vos troupes ; menacez
de chastiment exemplaire ceux qui vous
feront de faux rapports, & ne croyez point
estre Roy de France, à moins que de voir toute
la France paisible sous vostre obeyssance, & d’en
auoir chassé l’oppression, la tyrannie, & la sedition
auec tous les Estrangers, depuis le plus grand
iusqu’au plus petit. Commandez aussi qu’on
vous lise souuent l’Histoire, & sur tout celle des
Princes, qui ont releué des Monarchies chancelantes,
comme Cesar Auguste, Vespasian, Trajan,
Septimus, Seuere, Carus, Probus, Aurelian,
Constantin, Iustinian, Iustin, Theodose ;
& dans cet Empire, celle de Charlemagne, Philippe
Auguste, Sainct Louis, Clouis, Louis vnziesme,
Charles VIII. & de l’incomparable
Henry le Grand. Ne dedaignez pas mesme de
ietter les yeux sur celle de ma vie, puis que dans
la conformité que mon sort au commencement
eut auec le vostre, elle a beaucoup de sujet, qui
meritent que vous preniez le soin de les imiter.
Image de la page