[retour à un affichage normal]

Mazarinade n° B_3_3

Image de la page

Anonyme [1652], L’ESPRIT DV FEV ROY LOVIS XIII. A SON FILS LOVIS XIV. Luy monstrant que la mauuaise conduite de Mazarin, est la cause des troubles de l’Estat. Et luy donnant les moyens infaillibles de les appaiser, par son retour en sa bonne Ville de Paris. , françaisRéférence RIM : M0_1287. Cote locale : B_3_3.

dans mon Estat : & ie ne doute point aussi
que la precaution dont i’vsay depuis en l’esloignant
de ma Cour, ne parroisse tres-iuste à ceux
qui sçauent comme vn Constantin fils d’Irene,
Empereur de Constantinople, fut traité par cette
Mere ambitieuse, pour auoir eu trop d’indulgence
pour sa personne, & qui sçauront aussi ce
que la Reine vostre Mere entreprend sur vostre
autorité, pour se conseruer dans vostre Empire,
le gouuernement dont toute la France la iuge
indigne.
 
Cet exemple que ie propose moins afin que
vous l’imitiez, que pour vous obliger d’en detester
la resolution, auroit plus d’horreur, si la mere
de ce Prince Romain auoit eu moins de malice &
de fureur : mais ce qui deuoit obliger son fils à
souffrir toutes ses violences, est qu’il estoit redeuable
à ses soins & à ses crimes, de l’Empire
aussi bien que de la vie : au lieu que vostre Mere
vous ayant donné le dernier de ces biens, s’efforce
de vous rauir l’autre : & ne peut nier qu’elle
ne tende de tout son pouuoir à cet effet, puisque
elle met le Roy d’Epagne son frere en possession
de vos meilleures villes, & qu’elle inuestit vn autre
Espagnol ou Sicilien son Fauory, de la souueraine
Auctorité. C’est ainsi que faisant moins l’office
de mere que de vostre ennemie, elle merite
vn traittement moins fauorable, que celuy qu’elle
reçoit de vostre Majesté, qui s’en void sans cesse