[retour à un affichage normal]

Mazarinade n° A_3_14

Image de la page

Anonyme [1649], L’AMBITIEVX OV LE PORTRAICT D’ÆLIVS SEIANVS EN LA PERSONNE DV CARDINAL MAZARIN. , françaisRéférence RIM : M0_73. Cote locale : A_3_14.

L’AMBITIEVX
OV
LE PORTRAICT
D’ÆLIVS SEIANVS
EN LA PERSONNE
DV CARDINAL MAZARIN.
CE n’est pas d’auiourd’huy que l’ambition a estably son
empire sur les cœurs vils & abiets ; les anciennes & modernes
Histoires nous le tesmoignent assez ; mais c’est à
present que nous esprouuons trop funestement l’effet
de l’ancien Prouerbe. Qu’il vaudroit mieux qu’vne Cité abimast, qu’vn
pauure enrichist. Si les gens de bien eussent sçeu les mal-heurs qui
nous deuoient arriuer par l’ambition de Mazarin, eussent-il pas
plutost souhaitté voir vne Cité ruinée, que Mazarin éleué en la
grandeur & dignité où nous l’auons veu, sans l’auoir merité ; au
moins les gens de bien auroient eu cette consolation de sçauoir
qu’il n’y eust eu que les habitans de cette desolée ville, qui eussent
souffert ; où nous voyons maintenant non pas vne ville souffrir
beaucoup, mais vn Royaume entier : que dis-ie ? vn Royaume, ie
croy que sans blaspheme l’on peut dire tout l’Vniuers, ou du moins
la meilleure partie, qui est la Chrestienté. Passons outre, & ne
nous amusons pas tant à discourir sur les souffrances, les discours
n’en sont gueres agreables ; disons plutost que le monde iusques auiourd’huy
n’a point esté sans traistres & sans ambitieux ; Dés les
premiers siecles il y a eu vn Cain, & maintenant nous auons vn
Mazarin, & comme il est veritable qu’vn homme qui desire faire
quelque bonne action, cherche à imiter celles de ses predecesseurs.