Mazarinade n° B_11_22
Image de la page
Anonyme [1652], LES SENTIMENS D’VN FIDELLE SVIET DV ROY, Contre l’Arrest du Parlement du vingt-neufiesme Decembre 1651. , français, latinRéférence RIM : M0_3648. Cote locale : B_11_22.
ou quelque proportion d’authorité entre les Iuges
qui les ont condamnez ; le premier ayant esté jugé par vn commandement
& par vn oracle souuerain de la Majesté du Prince ;
& le dernier n’estant condamné que par vn Arrest d’vne simple
Cour de Parlement, & par vne Sentence manifestement renduë
(sans parler de tant d’autres defauts que nous auons marquez)
contre l’ordre, l’intention, & l’expresse volonté du Roy ?
Mais ce qui nous doit le plus estonner en ce sujet, est, que
ceux qui veulent defendre par exemple vne entreprise sans
exemple, ne s’apperçoiuent pas, que celuy qu’ils alleguent se
destruit & se refute par luy-mesme. Car en mettant vn prix
sur la vie criminelle de l’Admiral de Chastillon soit que ce faict
soit faux ou veritable ; oza-t’on estendre la rigueur de ce jugement
à la personne du Cardinal de mesme nom, & assujettit sa
teste aux mesmes peines, que celle de son frere, quoy que par
l’horreur de son apostasie qui le fit tout ensemble deuenir rebelle
du Roy & de l’Eglise, il eut desia merité d’estre priué, comme
il fut aussi, de la dignité de Cardinal, qu’il auoit violée au
premier chef, & de la Communion Romaine, qu’il auoit postposée
à celle de Caluin. Et ainsi pour iustifier la profanation
estrange, qu’on a faire de cette dignité toute Apostolique, on
allegue vn exemple qui nous fait connoistre, qu’on l’a reuerée
dans ceux mesmes qui l’auoient perduë, par le plus grand des
crimes, ou pour dire mieux, qu’on a voulu la respecter iusques
dans les moindres impressions, qui paroissoient en estre restées
dans vn apostat, comme les lieux sacrez se font honorer apres
leur cheute, & sont toûjours adorables dans leurs ruїnes.
Mais pour le Cardinal Mazarin, il ne suffit pas de le traiter
plus inhumainement qu’vn apostat, & vn deserteur de la Foy
Romaine, & de prostituer ou de vendre simplement sa vie, à la
rage des meurtriers : il falloit l’achepter auec ses biens, destruire
& dissiper ce tresor in comparable de volumes & de liures anciens,
qu’il auoit consacré à l’vtilité publique, & exposer en
vente ce que l’Antiquité nous a laissé de plus memorable, &
de plus riche, pour payer vn parricide, dont elle ne vit iamais
d’exemple.
Seroit-il donc possible qu’on vist parmy nous des ames si
barbares ou si aueuglées, que de pouuoir prendre, contre l’intention
Image de la page