ne doiuent pas estre moins inuiolables, que ceux que Meroüée faisoit
auec ses idolattes : & les Decrets de l’Escriture saincte ne nous
sont pas en moindre veneration, que les authoritez de l’Histoire profane.
Vous voila desia vaincu par des Arrests que vous ne sçauriez casser,
sans vous combler l’esprit d’vne reprobation eternelle. Cela vous
fait bien voir, Monsieur, que les Roys ont vne puissance tellement
souueraine sur leurs Sujets, qu’ils n’ont qu’à choisir auec vne extreme
resolution, ou la mort, ou l’obeïssance. L’Escriture saincte est
assez fertile en des exemples de cette nature : & vostre premier Censeur
ne manque pas de vous en fournir d’vn assez bon nombre sur cét
article. La Sapience infinie nous apprend au huictiéme chapitre de
son Ecclesiaste, que le Roy peut faire de nous tout ce qu’il luy plaira,
sans exception quelconque. Ce mot de tout, est vn terme si vniuersel,
que l’entendement humain ne se sçauroit rien figurer, qui ne soit
compris de celuy qui comprend toutes choses. Quoy, oserez vous
bien apres cela, criminel Politique, donner des bornes à vne puissance
si absoluë & si approuuée, que celle des Monarques. Ce n’est pas
moy qui parle, c’est vn Dieu qui veut estre creu & obey sur peine
de la vie eternelle. Quiconque mesprisera ma parole, dit-il en sainct
Matthieu chapitre 10. sera plus griefuement puny que tous les Sodomites.
N’est-ce pas là nous donner la liberté de contrarier leurs volontez,
& de poser des bornes à leur puissance ? Est-ce là, de grace, nous
donner les moyens d’armer contre eux, & de les deposseder de leurs
Throsnes ? Israël demeurant tousiours souple, & tousiours obeïssant
sous la tyrannie de Saül, nous apprend assez bien ce que nous deuons
faire, comme ie l’ay dit cy-deuant, en cas de pareille rencontre. La
puissance absoluë est si necessaire à la Royauté, que le Prince ne sçauroit
estre iamais bien Souuerain, si elle se trouuoit tant soit peu lezée.
Ouy, la Royauté est vne dignité si esleuée au dessus de toutes les autres
dignitez, qu’il n’est que Dieu seul qui luy puisse prescrire des
Loix, & borner vne authorité si legitime. La puissance Royale n’est
pas moins inseparable de la personne des Souuerains, que la puissance
Ecclesiastique l’est du Chef de l’Eglise militante. Toutes deux
viennent immediatement de la part de Dieu, & la derniere n’a pas
plus de direction sur l’estre spirituel, que la precedente sur l’estat des
choses terrestres.

Les Roys sont des personnes si sacrées, que Dieu ne veut pas en
aucune sorte, qu’on soüille le respect qu’on leur doit de la moindre
de nos pensées. Songeons seulement à souffrir toutes les iniures
qu’ils nous feront patiemment souffrir pour l’amour de Iesus-Christ,