si nous voulons faire des merueilles pour nostre salut & pour nostre
gloire. Ces petits Dieux terrestres sont des Souuerains ordonnez de
l’Esprit infiny, pour rendre la Iustice à leurs Sujets, & non pas pour
la receuoir de qui que ce puisse estre. Le cœur de ces Arbitres de
l’Vniuers est en la main de ce Tout-puissant, & nous deuons les honorer,
& nous garder de les auoir pour ennemis en façon quelconque.
Ne perseuere point en des choses mauuaises, dit cet Adorable Legislateur,
car ils feront tout ce qu’il leur plaira, & de ce qui t’appartient,
& de la personne mesme. La puissance ne les abandonne iamais, &
leur parole nous doit estre continuellement redoutable. Le Sacrement
dont sa Prouidence eternelle les a voulu gratifier, les doit rendre
venerables à tous les peuples de l’Vniuers, & fussent-ils mesmes
tachez de quelque espece de tyrannie. Cet illustre charactere de
grandeur ne leur a esté enuoyée du Ciel, que pour marquer l’admirable
puissance qu’ils en ont receuë. Enfin ce signe visible d’vne chose
inuisible, leur est vne authorité si mysterieuse, qu’à peine peut-elle
estre parfaitement bien comprise des esprits plus doüez d’intelligence :
& nostre nouueau Politique apres cela, n’aura pas de la veneration
pour des personnes si sacrées. Quiconque méprise la puissance
souueraine, méprise le Souuerain qui l’a ordonnée : & qui méprise
le Souuerain qui l’a ordonnée, se rend abominable à Dieu &
aux hommes. Sainct Paul dit qu’il faut estre sujet aux Puissances
superieures, & qu’il n’en est pas vne qui ne soit ordonnée de Dieu.
Il faut inferer de ce Decret inuiolable, que ceux qui resistent à la
Puissance ordonnée de Dieu, resistent par consequent à l’ordonnance
de Dieu mesme, & se mettent au nombre des ames reprouuées.

Mais de grace, que fist Iesus-Christ, ce veritable Exemple de la
vie Chrestienne, tout innocent qu’il estoit, en la persecution d’Herode,
luy qui pouuoit armer le Ciel & la Terre pour la defense de sa
cause ? Il ne s’amusa pas à disputer contre ce malheureux Prince, ny
de son pouuoir, ny ne ses droits : mais il s’enfuit en Egypte, pour ne
pas choquer vne Puissance qu’il auoit luy mesme establie. Quand les
mouches à miel sont en la disgrace de leur Princesse, elles se percent
le cœur de leur propre aiguillon, pour ne pas viure dans ce desordre.
Les Perses se reduisent en cendre, touchez d’vne mesme aduenture.
Xenophon veut qu’il n’y ayt point d’animal au monde plus ingrat à
son Superieur que l’homme. Et nonobstant tout cela vous douterez
encore de la nature du tribut qu’on doit rendre à son Prince, puis qu’il
peut prendre tout ce que nous auons quand bon luy semble. De sorte
que si nous sommes obligez de rendre au Roy ce que nous luy deuõs,