Et s’ils sont Roys, il faut qu’il considerent aussi
qu’ils ne sont esleuez & maintenus à cette dignité,
que par le commun consentement des
peuples. Hors de cela, ils sont dans la mesme
categorie que le reste des hommes. Enfin si la
Declaration du Roy estoit iuste, raisonnable,
& selon Dieu lors qu’ils l’ont faite, il faut de necessité
qu’elle le soit encore presentement ; puis
quelle est tousiours appuyée de la mesme iustice
& de la mesme raison qui luy donna l’estre.

Ce sont des foibles suppositions, & des raisons
mal estudiées de dire que le Roy fut contraint
de donner sa Declaration contre Mazarin,
pour estre reçeu Maieur. Qui est ce qui
pouuoit refuser à son legitime souuerain, ce
qui est le priuilege de ses ayeulx, le terme de
son Authorité, le Caractere de son pouuoir,
& que la naissance, l’âge, les loix, le droit de ses
predecesseurs, & la fidelle passion des François,
arracheroient des mains de la plus abominable
rebellion, si la necessité le requeroit pour luy
en faire vn eternel sacrifice ? Estoit-il necessaire
que le Roy se remit en tutelle, & qu’il vsât de
fraude, de fourbe, de tromperie & de deception,
pour se rendre plus absolu ; pour auoir
vne chose qu’on ne luy sçauroit contester, &
qu’il pouuoit absolument auoir de luy mesmes ?