[retour à un affichage normal]

Mazarinade n° C_2_53

Image de la page

Anonyme [1649], DIALOGVE CONTENANT LA DISPVTE ET L’ACCORD DE LA PAIX, ET DE LA GVERRE. EN VERS BVRLESQVES. , françaisRéférence RIM : M0_1073. Cote locale : C_2_53.

C’est le tout si vous sçauez lire,
Et lors que vous voulez écrire
Pour vn passe-port seulement
Vous ne sçauez quoy ny comment,
S’il vous suruient la moindre affaire
Vous m’empruntez vn Secretaire
Vn Ambassadeur, vn Agent
Mais encores mieux mon argent.
Vous estes mere d’ignorance
Et vous l’allez remettre en France ;
Car Aristote ny Platon
N’aimoient point la poudre à canon,
Pour Ciceron, & pour Virgile
C’estoient des gens à faire gile
Et iamais ne furent si fats
De se trouuer dans les combats,
Pour vous parler encor de Rome
Mecenas estoit vn bon homme
Et fut de si doux naturel
Qu’il n’aimoit pas fort le düel.
Parlons de vos façons de viure
Dont ie veux faire vn plaisant liure,
Premierement dés le matin
Vous demandez du bran de vin,
La pipe, & la mesche allumées
Ioignant leurs puantes fumées,
Et puis tout le reste du iour
Si vous vous trouuez de seiour
Vous beuuez comme vne templiere
Oubliant vostre humeur guerriere,
Puis le lendemain ce dit on
Cinq ou six boulets de canon
Vous seruent comme de pillules
Pour euacüer vos crapules.
Mais lors que dans l’occasion
Vous n’exercez l’occision.
Vous n’estes plus qu’vne perfide
Vne assassine, vne homicide
Et vous beuuez le sang humain
Comme vous auiez beu le vin.
Vous n’aimez rien que le pillage
Tant à la ville qu’au village,