[retour à un affichage normal]

Mazarinade n° A_4_13

Image de la page

Anonyme [1649], LE HEROS PARISIEN AVX VRAIS FRANCOIS , françaisRéférence RIM : M0_1627. Cote locale : A_4_13.

& en sont morts, & ceux là se sont tellement saisis
le cœur, de se voir emporter iusqu’à leur paillasse, qu’ils
n’en ont plus du depuis que trainé leur vie ; & le tout
par la meschanceté d’vn homme. Maudit homme !
qu’il eust bien mieux vallu pour toy, que tu ne fusse
point nay, que d’estre toy seul la cause de tant de desolations
& d’homicides. La vengeance du Ciel, pour vne
milliace de bonnes ames qui ont pâty, te talonne, son
couroux te presse, & sa puissance te reserue pour la Catastrophe
de cette tragedie. Allons François, c’est pour
nous que le Ciel a pris les armes, & c’est par nous qu’il
le veut punir. Ne disons plus que nous auons à sauuer
nos vies, nos biens, nos hõneurs, nostre renom, nos femmes,
nos enfans, tout ce que nous sommes, & ce que nous
possedons : disons qu’il faut mourir pour Dieu, & pour le
Roy, & qu’il y va de la gloire de celuy que nous adorõs
de courir à la mort, ou de perdre vn homme, vn sacrilegue,
vn prophanateur des choses sainctes, vn Athée, qui
ne recognoist de Dieu que pour son proffit : qui n’est
monté au degré des plus illustres de son Eglise que pour
sa propre gloire, & qui n’a brigué ce rang de Cardinalat
en nostre France, que parce qu’il n’en auoit point à tenir.
C’est cet homme qui n’opprime seulement pas, n’y
pour les veufues, n’y pour les orphelins : mais qui porte
son enragée auarice iusqu’à tout vn peuple. Voylà
François, contre qui nous faut combattre, pour qui
nous deuons tenir, faictes le choix des deux, ou de mourir,
& les vostres dans la misere, ou de vanger l’honneur
de Dieu, le Roy, les vostres, & vous.
 

FIN.