[retour à un affichage normal]

Accueil > recherche > Affichage d'une occurrence en contexte

Mazarinade n° B_3_18

Image de la page

Anonyme [1652], LE GRAND RESSORT DES Guerres ciuiles en France. Faisant voir dans les vies de tous les Ministres d’Estat qui se sont ingerez de nous gouuerner. I. Qu’ils ont tousiours esté la source de toutes les dissentions publiques; & le sujet qui a fait prendre les armes aux Grands du Royaume. II. Qu’ils ont eux mesmes fait naître & entretenu les Guerres ciuiles, comme vn des moyens propres pour les rendre necessaires aux Rois, & pour se maintenir dans le Ministere. III. Qu’ils ont tousiours employé tous leurs artifices à detourner la conoissance des affaires d’Estat aux Rois, & fait tous leurs efforts pour abatre les Princes, & tenir les Peuples dans l’oppression. Le remede necessaire & Politique à tous ces desordres. I. Est de donner vn Conseil de sages testes au Roy, qui l’instruise dans l’art de Regner par soy mesme. II. D’éloigner de luy cõme des pestes d’estat tous ceux qui voudront s’opposer à ce loüable établissement. III. D’établir de rigoureux supplices pour les Ministres qui passeront leur deuoir, qui est seulement de donner conseil à leur Souuerain, sans iamais rien entreprendre de leur teste: De rendre le rang aux Princes du Sang qui leur est deu par leur naissance; & donner le repos aux Peuples. , françaisRéférence RIM : M0_1513. Cote locale : B_3_18.



Tajan auoit coustume de dire souuent, qu’étant
Empereur, il se gouuernoit à l’endroit des
particuliers de la mesme sorte, dont il eust souhaité
qu’ils se fussent gouuernez en son endroit, s’ils
eussent esté Empereurs, & luy personne priuée : si
nos Ministres sont de ce sentiment, nous n’auons
qu’à leur faire vne guerre irreconciliable, leur oster
tous leurs biens, les ruiner absolument, les perdre,
les exterminer, car ils nous en font de mesme, ils
n’ont garde de souscrire ainsi à leur perte, nous
sommes obligez aussi de preuenir la nostre, il n’y
a point de moyen de le faire, qu’en abbattant ces
Monstres d’authorité absoluë, il faut donc les détruire,
il y a de la gloire, de l’honneur, & vne
Paix au bout, qui doit estre le but & le terme de
toutes nos intentions.
Pour peu que la Reyne veuille relascher de cette
haute Protection qu’elle donne au Ministre insolent,
qui nous a si mal traittez, nous viendrons à
bout d’vn dessein si equitable, on en abolira pour
iamais la coustume pernicieuse en France, & nous
nous verrons heureusement deliurez de ces insatiables
Minotaures, qui font leur pasture de tant de
milliers d’hommes.
L’Histoire Romaine nous apprend, que Plotine
femme de Trajan, se voyant conduire auec tant
de pompe & de magnificence au Capitole, lors
que son mary fut declaré Empereur, se mit à dire
en iettant vn profond souspir, Ie souhaitte d’en sortir