[retour à un affichage normal]

Mazarinade n° B_3_18

Image de la page

Anonyme [1652], LE GRAND RESSORT DES Guerres ciuiles en France. Faisant voir dans les vies de tous les Ministres d’Estat qui se sont ingerez de nous gouuerner. I. Qu’ils ont tousiours esté la source de toutes les dissentions publiques; & le sujet qui a fait prendre les armes aux Grands du Royaume. II. Qu’ils ont eux mesmes fait naître & entretenu les Guerres ciuiles, comme vn des moyens propres pour les rendre necessaires aux Rois, & pour se maintenir dans le Ministere. III. Qu’ils ont tousiours employé tous leurs artifices à detourner la conoissance des affaires d’Estat aux Rois, & fait tous leurs efforts pour abatre les Princes, & tenir les Peuples dans l’oppression. Le remede necessaire & Politique à tous ces desordres. I. Est de donner vn Conseil de sages testes au Roy, qui l’instruise dans l’art de Regner par soy mesme. II. D’éloigner de luy cõme des pestes d’estat tous ceux qui voudront s’opposer à ce loüable établissement. III. D’établir de rigoureux supplices pour les Ministres qui passeront leur deuoir, qui est seulement de donner conseil à leur Souuerain, sans iamais rien entreprendre de leur teste: De rendre le rang aux Princes du Sang qui leur est deu par leur naissance; & donner le repos aux Peuples. , françaisRéférence RIM : M0_1513. Cote locale : B_3_18.

tous les rauages d’vne sanglante Guerre Ciuile.
 
Si nous n’auoins des exemples trop frequens dans
nostre Histoire, du chastiment qu’on a souuent ordonné
à leurs maluersations, nous serions peut-estre
plus en peine de nous en defaire à present que nous
sommes reduits sous leur insolente Tyrannie ; mais
comme leur injustice a tousiours esté manifeste, ils
ont eschappé rarement sans punition. Protade, vn
faquin d’Italien, qui sous la faueur de Brunehaut,
diuisa toute la Maison Royale, fut tué dans la Tente
du Roy Thiery en sa presence. Landays Ministre du
Duc de Bretagne, fut arraché des bras de son Maistre
pour estre massacré de ses cruautez, & puis cette
genereuse Troupe luy vint demander pardon à genoux,
de l’excez commis à sa veuë. Oliuier le Dain,
paya cherement l’abus qu’il auoit fait de la faueur de
Louys XI. Enguerand de Marigny fut pendu le premier
à Mont-Faucon, gibet qu’il auoit fait eriger
pour pendre ceux qui luy seroient contraires. Et tout
nouuellement le Marquis d’Encre a laisse à la posterité
vne exemple signalé de la fin trop funeste de tous
ces ambitieux.
Ie ne puis pourtant passer sous silence la punition
publique que fit faire Alexandre Seuere, de son plus
confident Ministre. Ce lâche & indigne possesseur de
toutes les faueurs les plus particulieres d’vn Empereur
veritablement illustre, abusant des bontez que
son Maistre pretendoit de communiquer gratuitement
à ses Subjets, leur vendoit les graces du Prince,