[retour à un affichage normal]

Mazarinade n° B_10_29

Image de la page

Anonyme [[s. d.]], LE FLEAV DE L’ESPRIT DE DIEV, SVR LES MINISTRES à deux Cœurs, à deux Maistres, & à deux Visages. "Le Seigneur veut que l’hypocrisie de ceux qui se glorifient en luy, pendant qu’ils le nient par des actions publiques, soit franchement reprise & hautement condamnées par les veritables Euangelistes de sa parole eternelle." Esaye 48. 58. & 66. , français, latinRéférence RIM : M0_1399. Cote locale : B_10_29.

que ce fut le plus benin & le plus souffrant Prince
du monde : mais s’estant aperceu où l’auoit conduit
l’ambition demesurée de ces gens-là, il se
resolut à cette poursuitte. C’estoit aussi par où
il deuoit commencer, s’il vouloit suiure le droit
chemin qui conduit les Princes à l’amour de ses
subjets & qui les fait regner sans crainte.
 
Mais pour remedier à tous ces desordres, il
faudroit que le Roy fit faire vn Edict, comme fit
Henry II. en l’an 1560. où il fut dit que tous les
Prelats, Euesques, & Diocesains resideroient en
leurs Eueschez & en leurs Diocezes, sur peine
d’estre declarez rebelles aux Ordonnances de sa
Maiesté, & d’estre poursuiuis comme perturbateurs
de la felicité publique.
Mais que font-ils encore dans leurs Eueschez
& dans leurs Diocezes ? au lieu de catechiser leurs
parroissiens, & de leur prescher les Misteres de
nostre Redemption : au lieu d’instruire les peuples
& de faire dignement la charge qu’ils occupent,
ils ne leur parlent que de payer les dixmes,
& les offrandes, ils ne s’entretiennent que de festins
& de promenades, de ieux & de paillardise,
de chasser & de paroistre, de traiter l’vn & de festiner
l’autre : d’auoir quantité de domestiques,
des chiens & des cheuaux, & de mille autres diuertissemens
de cette nature, sans auoir aucun
soin des pauures de qui ils prodiguent le bien
auec des voluptez incroyables.