[retour à un affichage normal]

Mazarinade n° B_11_17

Image de la page

Anonyme [[s. d.]], LE FLAMBEAV D’ESTAT, AVEC LEQVEL TOVS LES PEVPLES DE FRANCE peuuent voir comme ils sont obligez de s’vnir pour l’execution de l’Arrest du 29. Decembre 1651. & de l’Arrest du 23. Iuillet 1652. donnez en Parlement contre Mazarin, toutes les Chambres assemblées. OV L’ON VERRA, I. Que les Arrests d’vn si Auguste Parlement que celuy de Paris doiuent estre inuiolables; principalement quand ils sont donnez pour deliurer l’Estat de la prodigieuse tyrannie où il est. II. Qu’il y va de la gloire de Dieu, de l’honneur du Roy, du salut de la Couronne, du repos public, & du bien vniuersel de tous les peuples de France. III. Qu’il n’est point de François qui ne soit veritablement obligé de respondre vn iour deuant Dieu, de toutes les voleries, meurtres, violences incendies & sacrileges que Mazarin & ses complices font & feront de toutes parts, si on ne les en empesche pas, le pouuant faire. IV. Qu’il n’y a rien de si facile que d’en venir à bout par vn soûleuement general, puis que tous les autres moyens nous ont manqué. V. Et qu’il n’est point de peuple qui n’ait droit de se faire iustice soy-mesmes, quand on refuse de la luy faire. , françaisRéférence RIM : M0_1397. Cote locale : B_11_17.

C’est pourquoy la parolle de Dieu, ne s’addresse
iamais qu’à la volonté des hommes, sçachant
bien qu’elle peut tout sur nous, iusques à
nous vouloir assez souuent contraindre à faire
des choses impossibles. Enfin voulez-vous exterminer
toute la race Mazarinique, vous n’auez
qu à prendre vne bonne & ferme resolution
de le vouloir, puis que les moyens d’en venir à
bout, ne consistent qu’en cette ferme resolution
de le vouloir faire ?
 
Et certes, veu que cela ne dépend que de vostre
bonne volonté, & que cette bonne volonté
iointe auec le pouuoir que vous en auez, selon
que ie viens de vous le monstrer dans ma troisiéme
proposition, vous est si aisée, ie m’estonne
extremement de voir que vous soyez si lasches
à l’execution de vostre propre salut : mais d’vn
salut que vous témoignez desirer auec des passions
incroyables ?
Mais comment pourrez-vous accomplir cette
sainte volonté ? par vn sousleuement general
de tous les peuples de France. Et certes ie
ne croy pas qu’il y ait iamais rien de si aisé, ny
iamais rien de si facile. Paris ne sera pas plustost
soûleué que toutes les autres Villes de France,
à l’imitation, voudront faire la mesme chose. Il
n’y va pas moins de leur salut que du vostre, &