[retour à un affichage normal]

Mazarinade n° A_1_67

Image de la page

Monneraye [signé] [1649], ARREST DE LA COVR DV PARLEMENT DE BRETAGNE, DONNÉ LES SEMESTRES ASSEMBLEZ. TOVCHANT LA CONVOCATION des Estats generaux du Royaume, & particuliers de la Prouince. , françaisRéférence RIM : M0_196. Cote locale : A_1_67.

EXTRAICT DES REGISTRES
de Parlement.
ONT esté veuës, Chambres & Semestres assemblés,
les Lettres de Cachet du Roy, données à Sainct
Germain en Laye le dixiesme iour de Feurier mil
six cent quarante-neuf, signées LOVYS, & plus
bas de Lomenie. L’vne adressée au sieur Euesque de Rennes,
pour l’aduertir de se trouuer en la ville de Nantes le vingt-sixiéme
iour du mois lors prochain, pour assister à l’Assemblée
des Estats ordinaires de ce païs & Duché de Bretagne, afin
de leur faire entendre plusieurs choses concernantes les affaires
du Royaume, & dudit païs & Duché, dans lesquelles les
mots de Nantes & Sainct Germain sont en interligne, & ceux
de Ploërmel & Paris en droite ligne, rayez : Les deux autres
adressées au Doyen, Chanoines, & Chapitres de Rennes ; Et
aux Maires, Escheuins, Officiers, & Habitans dudit lieu,
pour leur donner aduis d’enuoyer leurs Deputez en ladite
ville de Nantes, au vingt-sixiéme dudit mois, pour assister en
l’Assemblée desdits Estats conuoquez en la forme ordinaire,
dans lesquelles les mots de Nantes sont en interligne, & ceux
de Ploërmel en droite ligne au dessous rayez. Trois autres
Missiues datées à S. Germain, le vingt-quatriéme Fevrier mil
six cent quarante neuf, signées la Melleraye, adressées audit
sieur Euesque de Rennes, au Chapitre & Cõmunauté dudit
lieu, par lesquelles il mande que le Roy ayant resolu de faire
assembler les Estats de cette Prouince au vingt-sixiéme iour
de Mars en sa Ville de Nantes, pour la nomination des Deputez,
qui doiuent assister aux Estats Generaux du Royaume,
lesquels sont assignez au quinziéme Auril à Orleans ; Et prie
ledit sieur Euesque de se trouuer audit Nantes ; Et lesdits