[retour à un affichage normal]

Mazarinade n° A_2_34

Image de la page

Mercier [de Poissy] [1649], DOCTRINE CATHOLIQVE ET VERITABLE DE MONSIEVR MERCIER, TOVCHANT L’OBSERVATION DV CARESME, ET LES MOTIFS POVRQVOY Monseigneur l’Archeuesque a permis l’vsage de la Viande. , françaisRéférence RIM : M0_1166. Cote locale : A_2_34.

examinons leur vie & leurs actions, nous trouuerons
qu’ils ont mené vn genre de vie tres-austere & tres rigoureux ;
la pluspart ne mãgeoiẽt que des legumes ou
des herbes sauuages, & ne beuuoient que de l’eau claire.
Lors que Dieu eust resolu de perdre Niniue & de
renuerser cette Cité opulente, le Prophete Ionas ne
trouua point de meilleur remede pour la conseruer
des foudres du Ciel que de luy ordonner le Ieusne, &
les Sacrez Cahiers rapportent que les hommes, les
femmes, les enfans & les animaux ieusnerent également.
 
L’Ange Raphaël apparoissant à Tobie luy témoigna
que ses oraisons estoient agreables à Dieu, parce
qu’elles estoient accompagnées de Ieusne, & les Machabées
ces vaillans Capitaines de l’Antiquité crûrent
ne pouuoir iamais obtenir la victoire dessus leurs
Ennemis que par l’abstinence & les Ieusnes, les Nations
les plus barbares & les plus éloignées des lumieres
de l’Euangile ont esté dans ce sentiment ; & si nous
en croyons à leurs Annales, elles pratiquent entr’elles
des Ieûnes & des austeritez. Passons des Histoires
prophanes aux Saintes, & de l’Ancien Testament au
Nouueau, nous trouuerons que S. Iean precurseur du
Fils de Dieu mena vne vie tres-austere, & vescut dans
vne abstinence continuelle : ce Sainct ne mangea iamais
que des sauterelles sauuages, & ne beut que de
l’eau toute pure. Le Sauueur du monde qui vint apres
luy, outre qu’il fut tres-austere en sa vie, ieusna l’espace
de quarante iours dans les deserts, comme nous
apprenons de l’Euangile, & les A postres qui luy succederent