[retour à un affichage normal]

Mazarinade n° A_6_69

Image de la page

La Colombière, Marc de Vulson de [?] [1649], LA PARABOLE DV TEMPS PRESENT. , françaisRéférence RIM : M0_2673. Cote locale : A_6_69.

en vne telle colere, qu’au lieu de proteger le troupeau
qui leur auoit esté donné en garde, & changer
ou diminuer leurs mauuais traitemens, ils
coniurerent sa perte, & enuoyerent par toutes
les forests voisines demãder du secours aux loups
& autres bestes farouches & sanguinaires, pour
leur aider à acheuer de deuorer ces innocẽtes brebis,
& les empescher d’aller paistre. Les ours de
Suisse y vindrent les premiers, les loups d’Italie
& d’Alemagne y accoururent, & les aigles de Pologne
y auolerent, & se ioignirent à quelques autres
chiens dénaturez, infideles & ennemis du
troupeau, pour tous ensemble l’exterminer. Et
afin d’en venir plus facilement à bout, ils vindrent
se loger tout à l’entour du parc, pour guetter
les brebis, & les empescher de venir aux herbages,
& deuorer tous ceux qui s’efforceroient de
leur apporter aucune pasture, pensans par ce
moyen les reduire à demander misericorde, &
ainsi se gorger à leur plaisir de leur sang & de leur
chair, & les perdre entierement.
 
Qui habet aures audiendi, audiat.
Mais le Pere de famille preuoyant, que tous ces
cruels & farouches animaux pourroient exterminer
son heritage, s’il n’y pouruoyoit, anima le
courage de quelques vns de ses principaux chiens
& des plus fideles, & leur donna tout le cœur qui
leur estoit necessaire pour resister, pour chasser
ou pour tuer ces bestes rauissantes, qui asseurément