[retour à un affichage normal]

Accueil > recherche > Affichage d'une occurrence en contexte

Mazarinade n° C_5_59

Image de la page

I. A. D. [1649], IMPORTANTES VERITEZ POVR LES PARLEMENS. PROTECTEVRS DE L’ESTAT. CONSERVATEVRS DES LOIX. ET PERES DV PEVPLE. Tirées des anciennes Ordonnances, & des loix fondamentales du Royaume. DEDIEE AV ROY. Par I. A. D. , français, latinRéférence RIM : M0_1686. Cote locale : C_5_59.


naturelle, & souffrent quelque diminution, c’est
lors que les troubles & les desordres publics trauaillent
les Estats, que les sterilitez & les miseres en ternissent
l’esclat & le lustre. Il y auoit des Prestres en
Egypte qui auoient charge d’annoncer & publier au
peuple, la cruë & le rabaissement du Nil, & quand on
vouloit sçauoir à quel poinct il estoit paruenu, parce
que delà dependoit tout le bon-heur de l’Egypte, on
alloit en vne Isle, au milieu de laquelle estoit vne
Colomne marquée & diuisée en plusieurs toises, &
lors qu’il commençoit à croistre, les Prestres auec
leur mesure qu’ils appelloient Cubitus, marquans de
combien ce fleuue estoit haussé, le faisoient sçauoir
au peuple, & quand il alloit iusques à seize coudées
& au dessus, il y auoit affluence & abondance de tous
biens ; s’il demeuroit à douze, on estoit asseuré d’vne
tres mauuaise année. Les Ordonnances de nos Rois
sont les Colomnes qui tiennent le pied des Estats,
des Villes & des Republiques, ferme & solide : Les
Parlemens ont en depost la regle & la mesure, pour
connoistre iusques à quel point peut croistre le torrent
de la puissance Souueraine, [illisible], virgam
æquitatis, virgam regni, au Psalme 44. Et lors qu’elle
demeure aux termes des anciens reglemens & statuts
du Royaume, l’on ne doit attendre que des prosperitez ;
si elle deroge aux Loix & diminuë la liberté publique,
c’est vne source de mal-heurs & de calamitez.
 
Voyons dans le particulier, combien aduantageuse
est la derniere Declaration pour le bien de
l’Estat, le repos & le soulagement des peuples.