[retour à un affichage normal]

Accueil > recherche > Affichage d'une occurrence en contexte

Mazarinade n° C_1_38

Image de la page

Anonyme [1649], COPIE DV BILLET IMPRIMÉ A S. GERMAIN EN LAYE, QVI A ESTÉ SEMÉ DANS PARIS PAR LE CHEVALIER DE LA VALETTE. TENDANT A FAIRE SOVSLEVER les Parisiens contre le Parlement. , françaisRéférence RIM : M0_795. Cote locale : C_1_38.


auoit desja donné Caën & le Comté de Ious. Attends-tu
des conseils fideles & de durée d’vn homme qui a manqué
à son Maistre, qui luy auoit fait l’honneur de l’appeller
dans les siens ; qui luy auoit fait tant de graces, & qui
a tourné casaque aussi souuent que l’occasion s’en est offerte ?
La Rethorique naturelle du Duc d’Elbeuf, pourra
elle te persuader qu’il prẽne autre interest en cette affaire
que d’auoir le Gouuernement de Monstreüil, qu’on a refusé
auec raison à vne personne de sa condition, & qui a
porté si long temps l’écharpe rouge ? Le Duc de Boüillon
veut Sedan, & serois tu si enragé que de contribuer à
donner vne entrée seure aux Ennemis, pour rauager la
Champagne par leurs courses, & venir iusques à tes portes
quand l’enuie leur en prendroit ? Le Coadjuteur veut
se venger de ce qu’on a rabattu le vol trop hautain qu’il
prenoit, voulant ioindre le commandement temporel
au spirituel, c’est à dire le Gouuernement de Paris à l’Archiepiscopat.
Ce sont-là les arboutans qui appuyent ta
desobeïssance ; le motif de leur mécontentement est parce
qu’ils veulent des places : cependant, si ie ne me trompe,
il me semble que ce Cardinal qu’ils déchirent & noircissent
tant, n’en a aucune, & qu’il s’en est defendu toujours
aussi viuement que les autres les ont recherchées.
Ie voy qu’il a bien sceu contribuer à accroistre le Royaume
de places & de Prouinces entieres, mais il n’a sceu
encore donner les mains à prendre aucun établissement
pour luy : & il fait voir vn exemple de moderation à present
inconnu dans cét Estat, qu’vn premier Ministre,
apres six ans d’heureuse administration, ne se trouue
auoir ny charge de la Couronne, ny Gouuernement de
Prouince, ny place, ny autre bien que quelques Abbayes