[retour à un affichage normal]

Mazarinade n° B_15_4

Image de la page

De Guénégaud [signé] [1652 [?]], ARREST DV CONSEIL DV ROY, tenu à Pontoise le 18 iour de Iuillet, 1652. Portant cassation de l’Arrest de la Cour de Parlement de Paris du premier Iuillet 1652. & autres procedures. , françaisRéférence RIM : M0_372. Cote locale : B_15_4.

du Preuost des Marchands estant en charge, & en
consequence d’vne pretenduë démission d’iceluy, qui
n’estoit en effet qu’vne protestation contre la violence
à luy faite & au public, & encores hors du temps accoustumé
& contre toute sorte de formes, par de pretendus
Députez des quartiers qu’ils auoient eux-mesmes nommés,
& fais conduire par force dans leurs Carosses à
l’Hostel de Ville, lesquels auroient estably en cette dignité
le sieur Broussel, l’vn des plus obstinez Partizans
de leur Rebellion, & auroient bien eu l’asseurance de
receuoir de luy le serment qui n’a accoustumé d’estre presté
qu’entre les mains de Sa Maiesté, Et d’autant qu’il n’y
a point d’aparence que les autheurs de tant d’entreprises
violentes & de tant de crimes en profitent impunement
ny que tout ce qui sera fait & resout dans vne Ville dont
la liberté est si manifestement opprimée contre l’intention
de tous les gens de bien qui n’osent faire ce qu’ils
doiuent, ny mesmes s’expliquer de leurs sentimens, puisse
estre legitime iusques à ce que le Gouuerneur & les
Magistrats, tant populaires qu’autres, y ayent esté restablis
dans la libre fonction de leurs charges : Que tous
les Seditieux ayent déposé le pouuoir tyrannique qu’ils
ont vsurpez, & que toutes choses y ayent esté remises
dans l’ordre ancien sous l’authorité de Sa Maiesté, qui
de son costé n’a rien obmis de tout ce qui a esté en son
pouuoir, pour donner à ladite Maiesté des prieres continuelles
de sa bonté, ayant pris vn soin particulier tandis
qu’elle a esté dans son voisinage d’y faire passer toutes
sortes de viures abondamment, au mesme temps que les
Factieux ont eu le credit de faire refuser à ses portes la