[retour à un affichage normal]

Accueil > recherche > Affichage d'une occurrence en contexte

Mazarinade n° D_1_47

Image de la page

Anonyme [1651], CATALOGVE DES PARTISANS. ENSEMBLE LEVR GENEALOGIE & extraction, vie, mœurs & fortunes. , françaisRéférence RIM : M0_646. Cote locale : D_1_47.


que comme il est notoire ledit Petit fut auparauant Procureur
au Chastelet, à tort & sans cause, & ledit Chabenat copiste
au Conseil.
 
Catelan, cette engeance venu des montagnes de Dauphiné,
lequel apres auoir esté Laquais en cette ville, fut
marié par Cornuel Intendant à la sœur d’vne nommée la
Petit, sa bonne amie, à present femme d’vne nommé Nauarot
Pourtraict : Lequel mariage dudit Catelan, iceluy
Cornuel donna audit Catelan, en faueur dudit mariage,
tous les Offices des Sergens vaccans iusques alors ; & en
suite ledit Catelan s’est aduancé dans la Maltote sous feu
Bullion & Tubeuf ; & entr’autres traittez a fait ces deux
retranchemens des gages, droicts & reuenus de tous les
Officiers de France, dont il a fait faire la recepte & recouurement,
sous le nom d’vn nommé Moysel, qui est son
Neveu, & s’appelle Catelan comme luy ; cependant il luy a
fait prendre ledit nom suppssé de Moysel, pensant le mieux
mettre à couuert de ses volleries & exactions.
Tabouret fils d’vn Fripier de cette ville, depuis Notaire,
& en suite Maltotier associé dudit Catalan, a fait de son
chef toutes les taxes, creations, & augmentations des Gresfiers
du Royaume, par le moyen dequoy ce drolle, outre ses
superbes bastimens, & plusieurs acquisitions qu’il a fait à la
campagne, a donné en mariage depuis six mois à vne sienne,
fille plus de six cens mil liures, & en a asseuré autant apres
sa mort.
Cantot beau-frere dudit Tabouret est son associé.
De Laune Conseiller au Chastelet, est principal associé
dudit Catelan, & est cause de tous les traittez qu’il a faits,
luy ayant fourni les moyens & l’argent.
La Railliere a esté Fermier des Aides auec le nommé
de Moussea, où ils ont vollé les Rentiers de l’Hostel de
Ville, par les presens & corruptions qu’ils ont faits audit
d’Emery, en consideration dequoy l’on a diuerty ausdits