[retour à un affichage normal]

Mazarinade n° C_11_16

Image de la page

Anonyme [1651], LA PROSPERITÉ MAL-HEVREVSE OV LE PARFAIT ABREGÉ DE L’HISTOIRE DV CARDINAL MAZARIN, OV SE VOID TOVTES LES RVSES ET toutes les Fourberies dont il s’est seruy pour arriuer au feste de la progieuse fortune où il s’est veu. AVEC VNE RELATION DE TOVTES les causes de sa disgrace. , françaisRéférence RIM : M0_2925. Cote locale : C_11_16.

pour sa querelle particuliere. On l’accuse
d’auoir fait perir, nos armées en Allemagne,
en Espagne, en Italie, & en Flandre, d’auoir
abandonné nos alliez, & d’auoir exposé
plusieurs Prouinces aux ennemis, afin d’entretenir
plus long-temps la guerre, pour mieux
pescher en eau trouble & pour se rẽdre plus cõsiderable.
On l’accuse d’auoir voulu attanter à
la vie de tous ceux qui ont voulu representer
à sa Maiesté les necessitez de ses peuples.
On l’accuse d’estre tout à fait ignorant aux afaires.
On l’accuse d’estre estranger, & par consequent
incapable du Ministere suiuant l’Arrest
de l’année 1617. On l’accuse d’auoir vsurpé
tyranniquement l’authorité Royale. On
l’accuse d’estre d’vne naissance indigne de sa
charge. On l’accuse d’auoir des intelligences
secrettes auec les ennemis de cette Couronne.
Et finalement on l’accuse d’estre Magicien,
& d’auoir grand commerce auec les esprits
immondes. On produit vn Factum contre
luy. Le parlement se seruant de l’Arrest qui
auoit esté donné contre le Mareschal d’Ancre,
où la Cour declare tous estrangers incapables
de tenir Offices, Benefices, Honneurs, Dignitez,
Gouuernemens, & Capitaineries en ce
Royaume : & se seruant encore de l’Arrest qu’il
auoit donné contre lui le 8. iour de Ianuier,