[retour à un affichage normal]

Accueil > recherche > Affichage d'une occurrence en contexte

Mazarinade n° C_11_16

Image de la page

Anonyme [1651], LA PROSPERITÉ MAL-HEVREVSE OV LE PARFAIT ABREGÉ DE L’HISTOIRE DV CARDINAL MAZARIN, OV SE VOID TOVTES LES RVSES ET toutes les Fourberies dont il s’est seruy pour arriuer au feste de la progieuse fortune où il s’est veu. AVEC VNE RELATION DE TOVTES les causes de sa disgrace. , françaisRéférence RIM : M0_2925. Cote locale : C_11_16.



Outre cela, l’vnion se trouue si grande entre
le peuple & le Parlement, que Messieurs de
Paris ne songent plus qu’à s’en aller teste baissée,
droit à Saint Germain querir le Roy qu’ils
ayment auec de grandes passions, pour le ramener
à Paris, & pour punir les autheurs de ce
desordre. La Reyne sembloit en ce rencontre
risquer le tout pour le tout sous le pernicieux
conseil de ce bonnet rouge. On arme de toutes
parts ; Messieurs de Paris se cotisent pour
faire vne leuée de quelque cinquante mille
hommes. Tous les autres Parlements de France
se ioignent auec celuy de Paris, & l’Archiduc
Leopold fait auancer toutes les troupes
qu’il auoit en Flandres, pour leur donner
main forte, sans conter ce que quelques personnes
de condition alloient faire en leur particulier,
pour perdre cét ennemy commun de
tous les peuples de Frãce. Et certes si l’on n’eut
trauaillé à pacifier les affaires, la France s’en
alloit estre perdue. Dieu pourtant nous redonna
la paix contre toute sorte de d’apparences
humaines. Le Roy, la Reyne, & toute la
Cour, reuiennent à Paris, & l’on ne se souuient
plus des choses passées. A peine commençoit-on
à iouïr des douceurs d’vne tranquillité publique,
que Mazarin ce tyran de tout le genre
humain, voyant qu’il auoit à faire à Monsieur