[retour à un affichage normal]

Accueil > recherche > Affichage d'une occurrence en contexte

Mazarinade n° C_6_46

Image de la page

Anonyme [1649], LA PAIX EN SON THROSNE DE GLOIRE, OV LA CORNE D’ABONDANCE apportée du Ciel à tous les bons François, par l’Ange Tutelaire de ce Royaume. , françaisRéférence RIM : M0_2649. Cote locale : C_6_46.


vne Paix asseurée ? Les Ecclesiastiques, qui sont les veritables
Ministres de la Parole de Dieu, doiuent-ils iamais prescher
que la Paix vniuersellement à tous les hommes, puis qu’ils doiuent
receuoir vn salaire condigne à leurs merites ? La Noblesse
peut-elle fleurir dans les biens & dans les Lettres, que par son
ministere ? Et le tiers Estat, qui n’est qu’vn composé de Bourgeois,
d’Artisans, de Laboureurs, & de quelque autre sorte de
personnes, le plus souuent inutiles à la Republique, peut-il subsister
que par le moyen d’vne Paix bien, establie, ainsi que nous
auons veu depuis peu de iours dans la ville capitale de ce Royaume ?
Le Sacrifice Propiciatoire, & le Sacrifice Pacifique, ne furẽt-ils
pas instituez de Dieu en la Loy de Moyse en action de graces
de ce que ce diuin Createur auoit donné la Paix à ses creatures ?
La Theologie, qui est vne science des choses Diuines, nous
presche t’elle autre chose que la Paix, dans tous les Documens
qu’elle nous donne ? De tous les plus beaux attributs dont Dieu
se glorifie, il ne fait estat que de celuy de Dieu de la Paix, ordonnant
aux Hebreux aussi bien qu’à ses Disciples de ne se saluer
iamais qu’elle ne fut de la partie ? Sainct Paul ne preschoit aux
Corinthiens que de viure en Paix & en concorde ? Iosué ne souhaitoit
que la Paix à son Peuple ? Et Moyse ne tachoit qu’à mettre
la Paix entre les vns & les autres ? Les Mysteres de la Religion
Catholique, Apostolique, & Romaine, furent-ils instituez de
ce diuin Principe de Paix, que pour donner la Paix à toutes les
Nations de la Terre ? Et Iesus Christ mesme, humilia t’il sa saincte
& sacrée personne, à se reuetir de nostre nature, & à mourir
en Croix pour le salut des hommes, que pour establir vne Paix
eternelle entre sa diuine Majesté, & des mortels ingrats à tant de
graces qu’il luy à pleu de leur faire ? Ne dit-il pas en Esaye que
les Peuples ne se doiuent plus esleuer contre les Peuples, & que
les Batailles seront inutiles, parmy les Habitans de la Terre ? Le
Prophete Royal Dauid ne nous asseure t’il pas que la Iustice & la
Paix doiuent regner par tout l’Vniuers, apres l’Incarnation du
Verbe ? Ce qu’il confirme encore dans vn autre passage, lors qu’il
dit, que le lieu où il doit estre a esté fait en Paix, afin qu’il peust
mieux trauailler pour le salut de tout le Monde. Et le diuin Apostre,
ne prefere t’il pas la Paix au reste de tous les dons celestes ?
Dieu ne voulut pas que Dauid luy fit eriger vn Temple, à cause
qu’il estoit encore tout sanglant des Nations qu’il auoit fait passer
au tranchant de l’espée, quoy qu’il ne se fut porté à les exterminer