[retour à un affichage normal]

Mazarinade n° C_1_15

Image de la page

Anonyme [1649], LA MISERABLE CHEVTE DV MINISTRE D’ESTAT ESTRANGER. ET SON BANNISSEMENT, SA FVITTE premeditée, & sa retraite en Turquie. , françaisRéférence RIM : M0_2483. Cote locale : C_1_15.

& luy faire voir qu’il n’est pas iuste à vn Premier
Prince du Sang de s’armer contre le Royaume, dont
il est l’vn des principaux Astres, en faueur d’vn traistre
Estranger, qui a volé tous ses tresors, fait mourir
par sa tyrannie la plus grande partie de ses peuples,
enleué son Roy, & qui pour plus de crime encore,
veut seul s’attribuer son Authorité, & rauir s’il peut
sa Couronne ? Il est indubitable, Messer Iules, que ces
Altesses, & que ces autres Heros, qui se sont laissez
insensiblement deceuoir à mes fausses apparences,
seront bien tost illuminez de Dieu pour voir clairement
mes mauuaises intentions, que ie confesse n’auoir
iamais eu pour but, soit en Allemagne, soit en
Catalogne, soit en Flandres, & soit en Italie, que pour
enrichir la Couronne d’Espagne du debris de celle
de France. Si ce mystere d’iniquité est vne fois découuert,
comme désja la plus grande partie de la
Cour en a de fortes coniectures, & comme le Parlement
de Paris, & tous les autres, n’en doutent désja
plus, ne dois ie pas croire que les mesmes armes que
ie fay agir contre le Royaume, se tourneront contre
moy mesme, pour punir exemplairement le corps
dont l’ame est si criminelle ?
 
Hé quoy meschant & abominable perturbateur
du repos public ! ne suis ie pas condamné & bany par
vn Arrest autentique & solemnel ? mes biens n’ont ils
pas esté confisquez ? les communes ne sont elles pas
commandées de me courir sus ? Non, non, ma perte
est asseurée, & ie suis l’autheur de trop de maux pour
pouuoir jamais eschapper à la vengeance de la Iustice
Diuine & humaine.