[retour à un affichage normal]

Accueil > recherche > Affichage d'une occurrence en contexte

Mazarinade n° A_6_10

Image de la page

Anonyme [1649], LA MISERABLE CHEVTE DV MINISTRE D’ESTAT ESTRANGER. ET SON BANNISSEMENT, SA FVITTE premeditée, & sa retraite en Turquie. , françaisRéférence RIM : M0_2483. Cote locale : A_6_10.


trahisons, de mes vols, de mes artifices, & de mes impietez,
puis que mon ame est endurcie & obstinée
en son peché, l’impie qu’elle est, aimant mieux l’Enfer
que le Paradis. Que l’on considere s’il y eut iamais
au monde vn plus detestable, & plus scelerat
homme que ie suis ! l’entends incessamment à mes
oreilles les cris & les gemissemens des vefues, des
orphelins, & des pauures languissans. Les premieres
m’accusent de la mort de leurs maris, les seconds se
prennent à moy du trépas de leurs peres, & les autres
en general me conuainquent d’auoir esté le seul autheur
de leur misere.
 
Or puis que la tres-humble Remonstrance que le
Parlement de Paris a faite au Roy & à la Reyne me
fait connoistre qu’il demande, que ma mort expie
tous les execrable crimes que i’ay faits à la France, ie
me contente de ma cheute ; & pour euiter mon supplice,
ie luy dis adieu ; & selon l’aduis du grand Armand,
ie la quitte, pour aller sejourner ailleurs. Mais
en quelle Contrée pourray-ie establir ma demeure
pour estre en seureté ? Depuis six ans, l’Allemagne
me nomme la cause de sa ruine, l’Espagne ne pardonnera
iamais à ma trahison ny à mon infidelité, l’Italie
me haït & me deteste, l’Angleterre, la Suede, le Dannemarc,
la Pologne, la Hongrie, & la Holande sçauent
trop mes meschancetez pour me donner retraite :
que feray-ie donc ? où me retireray-ie ? Puis que
ie ne puis plus trouuer d’azyle chez les Chrestiens, ie
vay acheuer de passer ma meschante vie à Constantinople,
parmy les Infideles.

FIN.