Mazarinade n° A_6_5
Image de la page
Anonyme [1649], LA MANNE CELESTE, OV L’HEVREVSE ARRIVEE du premier Conuoy de Viures à Paris: AVEC LA GENEREVSE SORTIE DES PARISIENS. , françaisRéférence RIM : M0_2405. Cote locale : A_6_5.
de la campagne, qui ont fait mouuoir les ressorts d’vne entreprise
si hardie, & si glorieuse, & leur ont donné le courage
de tout entreprendre pour secourir nostre misere.
Mais dequoy nous eussent seruis tant de biens amassez
dans vne Ville distante de celle-cy de quatorze lieuës, si le
mesme Dieu, qui par sa Prouidence auoit fait faire ce grand
amas, n’eust faict naistre dans l’ame genereuse du Duc de
Beaufort, & dans celles de tous nos autres Generaux, vne
extraordinaire vigueur, pour par leur insigne valeur, & courage
magnanime, trauailler malgré la ferme resistance de
nos ennemis, à conduire & mener heureusement ce fameux
Conuoy dans le lieu destiné pour sa retraite ?
Ce ne fut pas vne petite entreprise que celle-là ; nos Mazarinistes
enflez de la vanité d’vne action du iour precedent,
qu’ils nomment assez in discretement vne grande victoire,
quoy que par la perte des plus notables Personnages de leur
armée, elle leur fut plus funeste, qu’auantageuse, occuperent
en peu de temps tous les passages par où ils croyoient que
ce Conuoy deuoit passer. Leurs espions n’auoient pas manqué
de les fidellement aduertir, que ce ieune Mars, en qui
sont nos meilleures esperances, cét inuincible Heros, le Duc
de Beaufort, issu de l’illustre race des Bourbons, estoit sorty
de Paris, pendant que l’on se battoit à Charenton, auec des
forces considerables pour aller querir toutes ces prouisions
de bouche, les amener, & les faire passer, auec cette ferme
resolution, de mourir ou de vaincre. Ce General ayant sceu
que l’Armée Cardinaliste occupoit les principaux endroits
par où il faloit qu’vn si grand attirail de charettes, de chariots,
de cheuaux & de mulets chargez, de bœufs, de moutons
& de pourceaux, passassent de necessité, inuoque
l’assistance du grand Dieu des batailles, & sans autre ceremonie,
ordonne, & range ses Trouppes, d’Infanterie & de
Cauallerie, en bataille, se met à leur teste armé de toutes
pieces, & commence à faire sa marche.
Quelques Coureurs, qui s’estoient par son ordre détachez
Image de la page