[retour à un affichage normal]

Mazarinade n° A_6_5

Image de la page

Anonyme [1649], LA MANNE CELESTE, OV L’HEVREVSE ARRIVEE du premier Conuoy de Viures à Paris: AVEC LA GENEREVSE SORTIE DES PARISIENS. , françaisRéférence RIM : M0_2405. Cote locale : A_6_5.

LA MANNE CELESTE, OV L’HEVREVSE
arriuée du premier Conuoy de Viures, à Paris : Auec
la genereuse sortie des Parisiens.
Qvelles plus grandes resioüissances pouuoient
iamais receuoir les premiers Peuples du monde,
& les habitans de la plus florissante Cité de
l’Vniuers, que l’on afflige iniustement par la
guerre, & que l’on veut destruire par la faim,
que devoir naistre l’abondance de toutes choses dans leur
Ville, lors que la fureur & la rage de ses ennemis trauaillent
nuit & iour par de puissans efforts à la faire perir par la disette ?
Ce n’est pas sans sujet, genereux & vaillans Parisiens,
que i’ay donné pour tiltre à ce discours, LA MANNE CELESTE,
puis que c’est la seule Prouidence de Dieu, qui a fait
faire ce grand amas de toutes choses, pour nous substanter,
& nous desassujettir de la tyrannie, ou le lasche & scelerat
Estranger, Mazarin, qui fait mouuoir contre nous les principales
puissances du Royaume, nous veut faire mourir.
Sans vne aide particuliere, & fauorable du Ciel, quelles
gens auroient osé entreprendre, d’amasser, & de recueillir
parmy les bourgs & les villages à quatorze, quinze &
vingt lieuës de Paris, tant de biens & de viures de toutes sortes,
& les resserrer dans Estampes ; puis que tous les endroits
d’autour cette grande Ville, & autres lieux plus eloignez,
sont tous couuerts de Trouppes ennemies, qui n’espargnent
ny sexe, ny âge, où ils ne laissent des marques de leur fureur
& de leur violence ? Sans doute, chers Compatriotes, c’est
d’enhaut que nous est venu ce secours, & ce sont les sainctes
inspirations qui en sont descenduës dans le cœur des peuples