[retour à un affichage normal]

Accueil > recherche > Affichage d'une occurrence en contexte

Mazarinade n° C_5_73

Image de la page

Anonyme [1649], LA IVSTIFICATION DV PARLEMENT ET DE LA VILLE DE PARIS DANS LA PRISE DES ARMES ; CONTRE L’OPPRESSION & Tyrannie du Cardinal Mazarin. , françaisRéférence RIM : M0_1796. Cote locale : C_5_73.


leur procez, l’asseurer des humbles seruices du Parlement
& de ses obeïssances, & la conjurer auec toutes les instances
possibles de ramener le Roy en sa bonne Ville de
Paris : Mais le procedé duquel l’on a vsé enuers eux ausquels
on a refusé toute audiance, mesmes comme à des personnes
priuées ; le traittement inhumain qui leur a esté fait par les
Ordres du Cardinal Mazarin, & l’enuoy par luy de certaines
lettres Patentes sous le nom du Roy au Parlement pour
la translation d’iceluy en la Ville de Montargis, ont fait connoistre
que ce specieux, mais faux & supposé pretexte qui
n’a iamais esté crû de personne du mõde, comme trop esloigné
du sens commun, estoit vne pure inuention de l’esprit
malicieux du Cardinal Mazarin pour diuiser le Parlement
d’auec soy-mesme, jetter la discorde entre les Cours Souueraines,
& principalement entre le Parlement & la Ville de
Paris, pour plus facilement les perdre estans attaquez diuisément ;
Ce que voyant le Parlement, & que le Cardinal
Mazarin entreprenoit, non seulement sur leur vie & liberté,
mais encor sur celle de la ville de Paris (laquelle est en
sa speciale protection) qu’il auoit commencé à vouloir opprimer
par des Taxes faites, à cause du Toisé & de l’Abonement
du Domaine, pour en suite acheuer son dessein d’assujetir
ses Bourgeois à souffrir toutes les impositions, lesquelles
sont payées par les villes taillables & Habitans
du Plat-païs, veillant pour sa seureté & son salut, laquelle
est la cause commune, elle luy a ordonné de prendre
les armes pour la garde de la ville, & pour s’ouurir les
passages des viures, faire retirer les gens de guerre, lesquels
en leur ostant la commodité des viures veulent reduire le
Parlement & la ville de Paris à rachepter leur vie, leur liberté
& le repos de leurs familles, en liurant au Cardinal Mazarin
les plus gens de bien du Parlement & de la ville de Paris,
les plus affectionnez & zelez seruiteurs du Roy, qu’il veut
sacrifier à sa haine & couroux comme des malheureuses
victimes.
 
Cette deffence, laquelle est l’effet d’vne longue patience