[retour à un affichage normal]

Mazarinade n° C_5_73

Image de la page

Anonyme [1649], LA IVSTIFICATION DV PARLEMENT ET DE LA VILLE DE PARIS DANS LA PRISE DES ARMES ; CONTRE L’OPPRESSION & Tyrannie du Cardinal Mazarin. , françaisRéférence RIM : M0_1796. Cote locale : C_5_73.

laquelle estant verifiée luy eust donné le moyen de tirer
de l’argent comptant de tous les Traittans & Partisans du
Royaume, & de porter la derniere main aux Finances du
Roy pour rendre l’année malheureuse par vn malheureux
commencement ; Il a enleué le Roy, ce sacré depost mis entre
ses mains, & confié à ses soins à deux heures apres minuit
de sa bonne Ville de Paris le sixiesme du present mois de
Ianuier, & dans le mesme temps la Ville de Paris s’est trouuée
inuestie & enuironnée de gens de Guerre, les passages
des viures occupez, la liberté des chemins ostez, la campagne
couruë par des Caualiers qui ont traitté les Subjets du
Roy comme des rebelles, & plus mal que ne feroient les
plus cruels & les plus declarez Ennemis de l’Estat : Cette
nouuelle a surpris le Parlement autant qu’on peut s’imaginer,
& sur le sujet d’icelle, s’estant le mesme iour extraordinairement
assemblé, quoy qu’il eust tout sujet de croire que
cet enleuement estoit vne declaration assez precise de la
mauuaise volonté du Cardinal Mazarin contre le Parlement
& la Ville, mais vn dessein tout formé de la ruïne totale du
Royaume ; Neantmoins pour ne pas manquer de respect enuers
leurs Majestez, & vsant de sa prudence accoustumée,
ayant appris que le Cardinal Mazarin, pour couurir le crime
de cet enleuement sous le nom du Roy, auoit escrit aux Preuosts
des Marchands & Escheuins de la Ville de Paris : Que
les desseins d’aucuns Officiers du Parlement contre son seruice
& mesme contre sa personne pour la mettre entre les
mains de ses Ennemis auec lesquels il les accusa d’auoir eu
intelligence, l’auoient obligé de se retirer de la Ville de Paris,
quoy qu’ils ne deussent point se mettre en peine de cette
calomnie laquelle se destruit assez de soy mesme ; NEANTMOINS
ils ont deputé le lendemain septiesme du present
mois de Ianuier les Gens du Roy vers leurs Majestez à saint
Germain en Laye, pour sçauoir de la Reyne les raisons de
l’esloignement du Roy, & apprendre d’elle qui estoient les
Officiers du Parlement qui auoient eu de mauuais desseins
contre son seruice & sa personne pour leur estre fait & parfait