[retour à un affichage normal]

Mazarinade n° C_5_73

Image de la page

Anonyme [1649], LA IVSTIFICATION DV PARLEMENT ET DE LA VILLE DE PARIS DANS LA PRISE DES ARMES ; CONTRE L’OPPRESSION & Tyrannie du Cardinal Mazarin. , françaisRéférence RIM : M0_1796. Cote locale : C_5_73.

en proye. Neantmoins il ne s’est pû deffendre d’assister aux
honneurs Funebres que quelques maximes d’Estat luy ont
fait rendre. Toute la France s’est consolée dans son mal
dans l’attente d’vn meilleur Gouuernement & du soulagement
du peuple qu’elle a estimé que sa mort apporter oit.
 
Le decez du défunt Roy ayant suiuy celuy du Cardinal de
Richelieu, on a esperé du bon naturel de la Reyne vn restablissement
de toutes choses dans son premier estat : On a crû
qu’elle seroit bien aise que le Parlement reprit son ancien ne
authorité pendant sa Regẽce, qu’elle ne souffriroit iamais les
desordres qu’auoit causé vn Fauory ambitieux & remply de
conuoitise ; Enfin qu’elle n’authoriseroit pas les actions
qu’elle auoit blasmées pendant le Gouuernemẽt du deffunct
Cardinal, mais sur tout qu’elle ne consentiroit iamais qu’vn
nouueau Ministre d’Estat prit soubs sa Regence le pouuoir
qu’auoit vsurpé le défunct Cardinal, auec lequel il auoit si
hardiment & insolemment entrepris sa persecution. Ce
sont les raisons qui l’ont porté à defferer à elle seule
la Regence absoluë du Royaume que le feu Roy luy
auoit donnée, limitée & conditionnée, mais il s’est trouué
trompé dans ces esperances : Car il s’est rencontré que le
Cardinal Mazarin, plus fourbe que le deffunct Cardinal,
abusant de la confiance que la Reyne prend en luy ; Cet
Estranger, que la trahison a esleué à la dignité de Cardinal,
& qui nous a esté laissé par le deffunct Cardinal, pour conseruer
sa famille en ses biens & honneurs, & acheuer la ruyne
de la France : Marchant sur ses pas & suiuant ses desseins,
porté d’vne mesme ambition pour luy en ses parens, & d’vne
plus ardente conuoitise, apres s’estre emparé de la personne
du Roy, sous vn nouueau Titre d’Intendant de l’education
Royale ; N’a pas seulement diuerty les deniers publics par
l’vsage des Comptans pour les employer à son profit & celuy
de ses parens, tant en Italie qu’en France : Mais encores
pour faire verifier au Parlement plusieurs grandes listes d’Edicts
& Declarations, à la foule & oppression de tous les
Subjets du Roy ; Il ne s’est pas contenté de faire enleuer de
la Ville de Paris les Presidens Gayen & Barillon (au dernier
desquels il a fait passer les Monts, ce que pas vn autre auparauant
luy n’auoit entrepris) Qui sont decedez, non sans