[retour à un affichage normal]

Mazarinade n° B_4_6

Image de la page

Anonyme [1652], LA HARANGVE DV ROY DE LA GRAND BRETAGNE, A LA REYNE DE FRANCE, Faicte au Chasteau de Sainct Germain en Laye le 6. iour de May 1652. sur l’arriuée des Deputez de Messieurs les Princes & du Parlement. , françaisRéférence RIM : M0_1560. Cote locale : B_4_6.

innoncent & oppressé. Malheur ! quand vne femme,
tant digne soit elle, veut vser de vangeance, au lieu
de pardon. Malheur ! quand les appuis d’vn Estat se
laisse gagner, c’est le commencement d’vne totale ruyne ;
c’est l’ouuerture du Tombeau des François ; c’est
l’an Climaterique des Fleurs-de-Lys : bref, c’est la consommation
des siecles de nostre climat : car apres les
propos de la Reyne tenus auec sa Maiesté Britanique,
il nous est difficile de plus rien esperer.
 
Chacun sçait que le sixiéme iour de ce mois, il y
eut Conference au Chasteau de Sainct Germain en
Laye, tant des Deputez des Princes que du Parlement,
ausquels la Reyne leur reprocha leur infidelité, & malveillance
que le peuple de Paris auoit conçeu en son
endroit au sujet de Monsieur Mazarin qui est (disoit-elle)
le plus excellent Ministre qui ayt iamais gouuerné
l’Estat, & ne leur donna autre audiance, les menassant
seulement de faire brusler la Ville & les Faux-bourgs
de Paris.
Le Roy de la grand Bretagne accompagné de la Reyne
sa Mere, plus propre à appaiser les discords qu’à esmouuoir
des querelles ; prit la parole, & remontra à la
Reyne que tout ce qu’elle faisoit, n’estoit que pour
amoindrir l’authorité Royalle, & se rendre au mesme
periode ou il estoit Luy & sa Mere : & en voicy la Harangue
qui suit cy-apres.