[retour à un affichage normal]

Accueil > recherche > Affichage d'une occurrence en contexte

Mazarinade n° B_9_23

Image de la page

Anonyme [1652], LA CENSVRE ET L’ANTIDOTE DE QVELQVES MAXIMES tres-pernicieuses, contenuës dans vn libelle qui a pour titre, Le recit du duel déplorable entre Messieurs les Ducs de Beaufort, & de Nemours. Addressé à la Noblesse Raisonnable & Chrestienne. , français, latinRéférence RIM : M0_672. Cote locale : B_9_23.


diuines ; Et par consequent ne connoistrons que tous les duelistes
dans ces deplorables combats n’ont pas vne once de courage,
comme ils n’ont pas vne estincelle du Christianisme, ny
vn atome de raison.
 
Donc, s’ils passent pour Vaillans, ce sera au Royaume des
aueugles & des ignorans, & parmy les demons, qui renuersans
la ceruelle, leur font chercher le repos dans le tourment, &
l’honneur dans l’infamie.
Mais me direz vous, le monde estime cela vne preuue ou
vne marque de courage ? Le monde, quel monde ? sinon le
monde insensé, enragé, desesperé, impie, déraisonnable, parricide,
denaturé, sans Religion & ennemy de tout bien. Et
si ce monde forcené fait vn jour passer pour vn trait de constance
ou de sagesse, de se tuer soy-mesme pour se deliurer des
afflictions & des ennuis de cette vie ; faudroit-il écouter ces
maximes, & suiure ses conseils ? mais passons à la troisiéme
doctrine, à sçauoir.
3. Que le Souuerain defend le duel comme chef de la Iustice, & ne
le condamne pas comme chef de la Noblesse.
De grace qui ne riroit d’vne distinction si grotesque, &
d’vne abstraction si subtile & metaphisique : mais toutefois
qui merite d’estre expiée par vn supplice, comme estant si
contraire au bien de l’Estat & aux Edits du Roy : qui ne sçait
que ces Ordonnances qui foudroyent le duel, s’addressent
principalement aux Nobles, qui se precipitent si ordinairement
dans ce mal heur : Et quand le Roy les fait executer en
place publique comme criminels de leze Majesté, leur sauue-t’il
la vie comme chef de la Noblesse ? ou fait il des Declararations
pour les publier innocens en cette qualité ? Que s’il
les fait mourir par les mains d’vn bourreau comme chef de la
Iustice : quel reconfort reçoiuent-ils de luy sous le titre de
chef de la Noblesse ? Et si on leur disoit en l’autre monde, que
pour s’estre battus en duel, on ne les punit point à cause de
leur qualité de Nobles : mais seulement à cause de celle de
Chrestien, pour laquelle ils seront éternellement damnez &