[retour à un affichage normal]

Mazarinade n° C_12_41

Image de la page

C. Q. A. P. L. C. M. D. L. V. D. P. A. M. D. N. 1650 [signé] = Dubosc-Montandré, Claude [?] [1652], LA PIERRE DE TOVCHE AVX MAZARINS. , français, latinRéférence RIM : M0_2765. Cote locale : C_12_41.

Mais si ceux qui sont de telles entreprises pour gaigner
ceux qui nous protegent, meritent qu’on leur
coure sus, comme partysans du Cardinal Mazarin,
& ennemis du salut des peuples, ceux qui taschent
de nous diuiser pour nous perdre par leurs faucetez,
ne meritẽt pas moins nostre hayne ; puis que les vns &
les autres, conspirent nostre ruine par differentes
voyes. Saintost qui est icy le distributeur des nouuelles
Mazarinnes, auec Beautru, & quelques autres
n’espargne point l’argnent de son maistre, pour tascher
d’insinuer par des faux bruits la crainte dans l’esprit
des peuples, & qui n’estant point assez hardi pour
les aller crier par les ruës luy mesme, sans du moins
quelque apparence de verité despuis qu’on la rendu
responsable de ce qu’il aduanceroit, donne des relations
manuscrites à de certains cabarettiers gagez
pour les monstrer à ceux qui vont boire ou manger
dans leur maison, affin que ses aduantages chimeriques
venant peu à peu des vns aux autres, tout Paris
en reçoiue l’impression qu’il en attend toutes les fois
qu’il sçait qu’on doit Fronder au Parlement, affin que
ces victoires immaginaires remportées sur Monsieur
le Prince relentissent pour le moins les esprits s’il ne
peut tout affaict les gaigner, & par ce moyen iettant
la crainte & la diuision dans le Parlement, il continuë
nos miseres en empeschant d’aduancer nostre bien
par vne vnion estroitte & generalle de tous les corps
auec son Altesse Royalle & Monsieur le Prince, contre
l’ennemy commum. Ce mesme petit Mazarin de
Saintost, d’abort qu’il peut apprendre que Monsieur