[retour à un affichage normal]

Accueil > recherche > Affichage d'une occurrence en contexte

Mazarinade n° A_3_23

Image de la page

Rivière, Antoine [1649], LES DERNIERES ACTIONS ET PAROLES DE MONSIEVR LE PRESIDENT DE BARILLON, DECEDÉ A PIGNEROL LE TRENTIESME AOVST mil six cens quarante-cinq. PAR LE R. P. ANTOINE RIVIERE, Docteur de Paris, Prieur & Vicaire General au Conuent de S. Augustin, à Pignerol. DEDIÉES A MONSIEVR L’ESNÉ, Conseiller du Roy, & Auditeur en sa Chambre des Comptes à Paris. , français, latinRéférence RIM : M0_1030. Cote locale : A_3_23.


sont presques les dernieres paroles qu’il prononça de
sa vie, apres vne confession parfaite, & qu’il ne faisoit
presque que de receuoir le precieux corps de I. Christ.
 
A quelques heures de là on luy apporta l’Extreme-Onction,
qu’il receut auec des sentimens tres-particuliers
de pieté, remerciant tous ceux qui auoient pris
la peine d’assister à ce Ministere, & demandant pardon,
mesmes aux moindres de ceux qui le seruoient ;
les conjurant de ne se point souuenir si durant son mal
il luy estoit eschapé contre eux quelques paroles impatientes ;
que la rigueur du mal les auoit outragez, &
non pas son cœur, & qu’il les auoit tousiours consideré
comme ses freres : neantmoins tous ceux qui l’ont,
ou visité, ou seruy durant sa maladie, ont remarqué,
que bien qu’il fust d’vn temperament sanguin, &
prompt, il n’y eut iamais rien de si patient ; ce n’estoient
qu’excuses, & que prieres, & souuent ses domestiques
rougissoient honteux de ses abbaissemens.
Monsieur de Seuigny, & le Reuerend Pere Haillan,
Iesuite, voyant qu’il affoiblissoit insensiblement, le
solliciterent de vouloir declarer l’estat de ses affaires,
& ses dernieres volontez ; mais sans s’esmouuoir, il leur
respondit, que l’estat present ou il estoit ne luy permettoit
pas de faire aucune disposition, que neantmoins sous le bon
plaisir du Roy, & si sa Majesté l’auoit agreable, il auroit
souhaitté que Madame sa femme eust l’entiere disposition
de ses biens apres sa mort ; qu’il auoit six enfans, quatre garçons,
& deux filles, qu’il desiroit estre esgalez, & qu’il ne
faisoit aucun auantage à son fils aisné, sinon qu’il luy laissoit
sa Biblioteque.