[retour à un affichage normal]

Mazarinade n° E_1_61

Image de la page

Peccot-Quanesi [signé] [1649 [?]], LETTRE D’VN RELIGIEVX A MONSIEVR L’ABBÉ DE LA RIVIERE : Où luy sont enseignez les faciles moyens de faire sa paix auec Dieu & le Peuple. , français, latinRéférence RIM : M0_1893. Cote locale : E_1_61.

ce Royaume tout vostre bon-heur, c’est ce que ne peuuent
conceuoir les mieux sensez.
 
Si Mazarin est Cardinal pour en deshonorer la pourpre ;
Vous l’auez voulu estre pour la rendre odieuse à tout
le monde.
Si Mazarin veut dominer les Princes dans cette qualité
de Cardinal, à laquelle il a joint celle de Ministre d’Estat ;
Vous auez fait tous vos efforts pour marcher mesme au dessus
de Mazarin. Ce fut pour cela, que dans la creance d’estre
Cardinal vous pristes l’Ordre de Prestrise, vous seruant
de ce noble caractere, comme d’vn moyen pour arriuer au
faiste de vostre orgueil insupportable. Mais Dieu a permis
que le Chapeau vous soit échapé pour vostre confusion, &
que le caractere de Prestrise vous soit demeuré pour vostre
condemnation.
Si Mazarin est ignorant, vous abusez de la Philosophie
que vous auez autrefois enseignée dans vn College de l’Vniuersité,
pour subuenir aux necessitez de vostre vie, vous
en seruant pour sur prendre les bons esprits, & piper les
foibles.
Si Mazarin par le nombre affreux des liures qui composent
sa Bibliotheque, s’efforce de passer pour quelque sçauant
Politique & quelque grand homme d’Estat, bien qu’il
ne soit qu’vn grand cheual propre pour l’étable ; Vous affectez
de n’en point auoir, afin de paroistre comme ignorant,
& faire croire à ceux qui ne vous connoissent pas, que vostre
sang vous a donné le rang que vous tenez, & non pas
les fallaces d’vne philosophie. Car à vous voir reuestu de
quinze ou vingt Abbayes, le cordon bleu au col, au lieu de
la corde, que vous meritez, & seant dans le Conseil d’enhaut
auec la qualité de Ministre, d’où les Princes sont exclus ;
il n’y a personne qui ne vous prist pour vn des premiers
Princes du Sang, ou pour mieux dire, qui vous pût prendre
pour le fils d’vn Mouleur de bois, pour vn Pedant de l’Vniuersité,
pour vn petit Aumosnier de feu Monsieur Habert
Eues que de Cahors, & pour vn homme qui en toutes ses
conditions n’auoit pas dequoy mettre sous sa dent. Sans
doute que vostre vie passera vn iour pour vne fable, aussi
bien que celle de Mazarin, mais aupres de ceux qui ne sçauent
pas ce que c’est d’auoir la fortune propice, & point de