[retour à un affichage normal]

Mazarinade n° A_4_8

Image de la page

La Mothe-Houdancourt, Henri de [?] [1649], CINQVIESME FACTVM, POVR MESSIRE PHILIPPES DE LA MOTHE-HOVDANCOVRT DVC DE CARDONE ET MARESCHAL DE FRANCE. CONTENANT LES INIVSTES ET extraordinaires procedures faites contre luy, par les artifices du Cardinal Mazarin. , françaisRéférence RIM : M0_2849. Cote locale : A_4_8.

l’armée de Catalogne, le Sieur Boisot Intendant & Secretaire
dudit Seigneur Mareschal, le Sieur Bellestat son
Aumosnier, le Sieur Raiault son Secretaire, le Sieur Dauid
son Agent à Paris, & le Sieur du Mas Caualier de son Regiment,
le Sieur Dorée Intendant de l’armée, les Sieurs
Talon & Moreau, commis de l’extraordinaire de la guerre,
auec leurs soubs commis, Colas, des Neus & Briandais ;
la Chapelle domestique dudit Sieur Talon, auec son frere
nommé la Coupe, vn appellé Donadou Sauuerat Orfeure
marié & demeurant à Mont blanc, & les appellés, Iaques
Oliuier, Fabre, Iean Collier, Martin Fadin, L’Algouazil
honeau, Soret, auec Cherard serrurier Catalan. Et crainte
qu’il n’en manquast quelqu’vn ; Monsieur le Tellier decreta
encore contre Denia Secretaire de Monsieur de la
Mothe & contre Dormé commis du Sieur Talon qui
estoient morts, il y auoit long-temps.
 
On a esté obligé de nõmer cette multitude, d’autant que
referant simplement le grand nombre de ces prisonniers, le
sage Lecteur l’eust pris pour hyperbole : ny ayant point d’exemple
dans toutes nos Annales, que pour faire le procés à
vn seul homme, on ait emprisonné tant de personnes,
Soubs le Regne de Charles VII. Le duc d’Alençon fut
iugé, & il ny eut auec luy qu’vn Secretaire arresté. Soubs
Louys XI. l’Heraut Mont-ioye & son fils furent seuls prisonniers
auec le Connestable Saint Paul : on n’en remarque
aucun dans les procés des Mareschaux de Gré & de Biez, &
de Montmorency : & en celuy du Mareschal de Biron, il n’y
eut qu’vn Secretaire. Barbin auec les Secretaires Ludouici
& Montaubert le furent seuls auec la Mareschale
d’Ancre ; auec le Mareschal de Marillac il ny eut que trois
prisonniers qui furent incontinent relaschez. Mais au subjet
de Monsieur le Mareschal de la Mothe, Monsieur le
Cardinal & Monsieur le Tellier, ont voulu establir cette
nouuelle Iurisprudence : que pour paruenir à leurs fins ils
pouuoient indifferemment emprisonner l’Innocent, comme
le coupable.