[retour à un affichage normal]

Accueil > recherche > Affichage d'une occurrence en contexte

Mazarinade n° B_13_2

Image de la page

Gaston / de Fromont [signé] [1652], LETTRE CIRCVLAIRE ESCRITE PAR SON ALTESSE ROYALE A MESSIEVRS LES GOVVERNEVRS DES PROVINCES, SVR LE SVIET DE SA QVALITÉ DE Lieutenant general du Roy en l’estenduë de son Royaume, Terres & Seigneuries de son obeyssance tant que le Cardinal Mazarin sera en France. , françaisRéférence RIM : M0_1823. Cote locale : B_13_2.


executez ; Il auroit fait promener lesdits Deputez de
village en village pendant trois sepmaines : Et en suite
demandé que mon Cousin & moy enuoyassions des
Deputez à la Cour, pour conuenir de plusieurs choses
auant son depart ; Mais quoy qu’apres les Declarations
solemnelles que nous auons faites audit Parlement,
il n’y eust plus rien à desirer de mon cousin n’y
de moy, & qu’ayant fait dire à sa Majesté par le sieur
President de Nesmond, qu’apres l’esloignement dudit
Cardinal, nous n’auions rien à concerter ny conuenir
auec Elle, mais bien à luy obeïr en tout ce qu’il
luy plairoit d’ordonner, auec tous les respects & les
soûmissions que nous sommes obligez de luy rendre ;
il soit certain qu’on ne pouuoit pas plus nettement exprimer
des intensions aussi sinceres, & aussi des-interessées
que sont celles de mondit cousin, & les miennes,
& que ledit Cardinal pouuoit non seulement en
faire vne espreuue tres asseurée en se retirant, (comme
il le promettoit) mais aussi mettre tous les Parlemens,
& tous les peuples contre Nous, si nous voulions,
apres son depart, entreprendre la moindre chose
contraire aux Declarations que nous auons faites ;
Neantmoins comme ledit Cardinal n’a iamais eu aucune
volonté de se retirer, & que mesmes ses plus affidez
se sont assez expliquez, qu’ils seroient bien empeschez
à ce qu’ils auroient à dire & respondre, si l’on
leur enuoyoit des Deputez, & que ledit Cardinal en
faisoit des railleries, disant à tous ses Emissaires que
son passe port n’estoit pas encore signé. Aussi ledit Parlement
a tres-iudicieusement reconnu cette verité