[retour à un affichage normal]

Accueil > recherche > Affichage d'une occurrence en contexte

Mazarinade n° C_5_24

Image de la page

D. B. [signé] / Cyrano de Bergerac, Savinien de [?] [1649], LE GAZETTIER DES-INTERRESSÉ. , françaisRéférence RIM : M0_1466. Cote locale : C_5_24.


ne peuuent pas estre de Geans. Tous les Princes
ne sont pas sortis de l’ancienne maison de Saxe, &
pour expliquer ma pensée par la remarque d’vne Histoire,
il n’appartient qu’à Seruius de coucher toutes
les nuicts auec la fortune. Il est mesme permis aux
particuliers de cueillir des rozes parmi les espines, de
choisir des perles dans le limon, & de tirer de l’ambre
du sable. C’est en cecy que la volonté des Roys peut
estre & leur excuse & leur loy, qu’ils sont en droit de
tirer des hommes naïs dans la fange & dans la poussiere,
pour les porter aux plus hautes charges, & que
leur choix est bien souuent vne marque de leur Iugement
& de leur conduitte. Ie n’en r’appelleray
point icy d’exemples, quoy que toutes les Monarchies
en soient pleines, & qu’on n’ait ven presque
autre chose dans tous les Empires. C’est assez pour
fermer la bouche à ceux qui declament d’abord
contre le Cardinal Mazarin pour estre nay dans vne
pauureté honteuse, & qui le treuuent digne de malediction
pour ce qu’ils le treuuent auiourd’huy digne
d’enuie. Les personnes qui l’ont esleué au Cardinalat
& au Ministere l’ont pû faire, pour ce qu’elles
l’ont voulu : & comme ces personnes là mesmes
nous doiuent estre sacrées, nous ne pouuions nous
opposer à leur volonté sans quelque espece de Rebellion
& de Sacrilege. Mais comme vne femme
autrefois appella de Philippe endormy au mesme
Philippe esueillé, nous pouuons aussi en appeller de
l’assoupissement au réueil, & de la Patience à la Iustice.
Le Cardinal Mazarin pouuoit bien mettre son
industrie en vsage, pour se lauer de la pauureté qui