[retour à un affichage normal]

Accueil > recherche > Affichage d'une occurrence en contexte

Mazarinade n° C_5_64

Image de la page

Anonyme [1649], INSTRVCTION PROMPTE ET FACILE, AVX PARISIENS POVR BIEN APPRENDRE l’exercice du Mousquet & de la Picque, & les rendre par faits en l’Art militaire. , françaisRéférence RIM : M0_1709. Cote locale : C_5_64.


costé gauche.
 
Ouurez vostre charge.
Ouurez la charge auec le pouce, tenant le mousquet arriere
de terre si vous auez la force,
Chargez le mousquet.
Chargez le mousquet des charges de la bandoliere, & le tenez
esleué de terre, si vous n’estes trop foible pour ce faire.
Tirez la baguette.
Prenez la baguette courte auec la main renuersée, hors de
son afuct, sans bouger de sa place, & tenez le mousquet haut.
Prenez la baguette courte.
Tenez la baguette courte la main renuersée, & la tirez du
premier coup tant hors que pourez à ce qu’au second coup elle
soit du tout dehors, & l’ayant retourné, la pousserez entre
la crosse, glissant la main promptement vers le bout d’embas,
pour la pouuoir tant plus seurement fourrer dans le mousquet
si l’on veut tirer à bale, on prendra la bale hors de la main,
dont l’on tenoit la baguette ainsi courte, ou bien hors de la
bouche, ou du lieu ou on la porte, & la mettra on soudainement
au mousquet.
Bourez ou pressez la poudre.
Il faut bourer la poudre, & la bale, auec la baguette dans
son mousquet, s’il se peut faire.
Retirez la baguette hors du mousquet.
Qu’oy fait, l’on reprend la baguette à main renuersée hors
du mousquet, en tenant le mousquet à ce qu’il ne touche terre
si possible est.
Prenez la baguette courte.
Et pour reprendre la baguette courte, il la faut pousser vne
autre fois contre le corps, comme cy-dessus est dit.
Remettez la baguette.
C’est qu’ayant repris la baguette au bout d’embas, on la
remettra diligemment, & auec discretion en sa place.
Reprenez le mousquet au deuant de la main gauche.
Puis voulant reprendre le mousquet en la main, il se faut
auancer auec la main gauche.
Tenez le mousquet droict auec la main droicte.
Et ayant repris le mousquet en la main droicte pres du gros
verin, il le faut tenir droict en haut pour le faire retourner auec
auantage en la main gauche.
Mettez le mousquet sur l’espaule.
Puis il faut remettre en toute diligence, & d’vne main le
mousquet sur l’espaule.