[retour à un affichage normal]

Mazarinade n° C_5_64

Image de la page

Anonyme [1649], INSTRVCTION PROMPTE ET FACILE, AVX PARISIENS POVR BIEN APPRENDRE l’exercice du Mousquet & de la Picque, & les rendre par faits en l’Art militaire. , françaisRéférence RIM : M0_1709. Cote locale : C_5_64.

EXPLICATION DES COMMANDEMENS
de l’exercice du mousquet.
Marchez & portez le Mousquet sur l’espaule gauche.
Chaque mousquetaire, doit tenir proprement, &
auec bonne grace son mousquet en marchant :
faisant venir le ressort, ou la clef du mousquet cõtre
l’espaule, la main pres du trou du pouce, & la
mesche, qui doit estre allumée aux deux bouts,
entre les petits doigts de la main gauche, il l’a doit porter
pendante en dedans le fust vers bas, pour a tout moment la
pouuoir allonger, & s’aider de l’vn des bouts, en relaschant
l’autre, il doit auoir outre les charges de sa bandoliere, vn
puluerin auec bonne amorce, pour s’en seruir a mettre au
bassinet.
Laissez couler le mousquet & le prenez de la main droicte.
Laissez couler quelque peu la main gauche, sans ayde de la
droicte, & prenez le mousquet bien legerement auec la main
droicte à l’endroit du gros verin : pour ce qu’en cet endroit le
mousquet estant en balance, ou contre poids, il s’en treuue
plus leger ; & sans se plier du corps, il le faut vn peu baisser
vers la main gauche.
Tenez le mousquet haut de la main droicte, & le laissez couler à
la main gauche.
Il faut tenir le mousquet de la main droicte seulement, & le
laisser aller doucement en l’autre main.
Prenez le mousquet en la main gauche.
Tenez le mousquet en la main gauche seule en contre poids
& qu’il ne soit trop haut, ny trop bas, ayant la main droicte
libre, & pour auoir plus grande force, il faudra mettre
le coude contre la hanche, si l’on est trop foible ou trop
las.
Prenez la mesche en la main droicte.
Prenez la mesche proprement hors de la main gauche auec
le pouce, & le deuxiesme doigt : tenant tousiours le mousquet
en hauteur competante.
Soufflez la mesche, & la tenez bien.
Puis l’on tient la mesche prise auec le pouce, & le deuxiesme
doigt vers la bouche, & la faut soufler sans se trop ab
baisser.
Mettez la mesche sur le serpentin.